Куыд зонæм, афтæмæй наукæйы ахадындзинад хуымæтæг царды егъау у. Æмæ алы наукон кусæг дæр кæддæр райдыдта фыццаг чысыл къахдзæфтæй. Нæ дарддæры æрмæджы хъайтартау. Фæсивæдæн сæ бон бацархайын уыди, уæлдæрахуыргæндæттæ æмæ колледжтæ цы наукон фæзуаттæ бацæттæ кодтой, уыдоны. Дзæуджыхъæуы тæккæ астæу йæ куыст радыдта фестиваль “Наука +”. Раст ма дзы скъоладзаутæ дæр равдыстой, цы наукон куыстыты бацархайдтой, уыдон.
Ацы гарзты руаджы сбарстой туджы æлхъывдад æмæ æндæр бæрæггæнæнтæ. Иртæстыты руаджы сбæрæг кæнæн ис, адæймаг рӕстытӕ дзуры æви сайгӕ кӕны, уый. Дзæуджыхъæуы экономикæйы колледжы студенттæ ахæм бæрзонд æмвæзадыл полиграфæй пайда кæнын райдыдтой фыццаг хатт. Аи ма ахуыр кæнынц æнгуылдзты фæдтæ исын. Фæлæ æрмæст механикон æгъдауæй. Кинонывты куыд вæййы, афтæ.
Абон Сабырдзинады проспект йæхимæ ‘лвасы наукæйы архайджыты. Апарахат дзы сты алыхуызон фæзтæ. Истори, хъæууон хæдзарад, зонадон хъæзтытæ. Алы ахуырадон организацитæ дзы равдыстой æмæ радзырдтой наукæйы сæ æнтыстдзинæдты тыххæй.
Наукæйы æппæтуæрæсеон фестиваль æрвылазон у. Афæдзæй-афæдзмæ йæ архайджыты нымæц рæзы. Фылдæр æргом здахын æм райдыдта фæсивæд дæр. Абон сын сарæзтой конференци. Лекцитæ сын амыдтой математикæ, истори, медицинæ, биологи æмæ информацион технологиты къабæзты наукæты кандидаттæ. Алцыдæр арæзт æрцыд ацы къабазы цымыдисдзинад æмæ бирӕвæрсыг æууæлтæ равдисынæн.
Ацы аз фестивалы фæлгæты сараздзысты 175 мадзалы. Наукон организацитæ, уæлдæр ахуыргæнæндæттæ, музейтæ æмæ чиныгдæттæ сараздзысты лекцитæ, интеллектуалон ерыстæ, наукон-техникон æнтыстдзинæдты равдыстытæ. Мадзалы сæйраг нысан – скъоладзауты æмæ студентты наукæйы архайынмæ сцымыдис кæнын.
