Дзантиаты Сæрмæт афæдз æмæ ‘рдæджы размæ байгом кодта бабызты хи хæдзарад. Уыимæ ма хуымæтæг бабызтæ нæ, фæлæ адæймаджы æнæниздзинадæн пайда мыггаг.
Адæймагæн æппæт хъæугæ микроэлементтæ, уыимæ æнæ фиуæй. Ахæм дзидзайы сæдæ граммы ис æрмæст 285 килокалорийы. Мулард, зæгъгæ, бабызты мыггаг æххæст у æппæт пайда миниуджытæй. Аргъ ын скæндзæн алчидæр.
Йæ бабыздон Дзантиаты Сæрмæт байгом кодта афæдз æмæ рдæджы размæ. Цæгат Ирыстоны паддзахадон унверситеты географион факультеты студент къорд рæстæг иртæста нæ республикæйы алыхуызон дзидзайы уавæр базарады. Равзæрста бабызтæ хæссын.
Бабызтæ ласынц Буденновскæй. Хæссынц сæ æрмæст хæрзхъæд хорæй.
350 нырма чысыл бабызтæ, иу уый бæрц та хъомылдæртæ. Ныртæккæ сын арæзт ис æппæт уавæртæ дæр. Сæрмагонд уæлдæфдзæуæн, цад, уæдæ сæ бынат æрвылбон цæуы æхсад дæр. Сæрмæты сыхæгтæй кæцыдæртæ кусын райдыдтой Сæрмæты хæдзарады.
Цæттæ продукци фылдæр уæй кæны социалон хызæгты руаджы. Бонмæ 30 бабызы бæрц. Æрæджы та ма хом дзидзайæ уæлдай сæ хыгъды фæзынд хæрзфых бабызтæ.
Амалхъом адæймаджы чысыл куыстуат æнтыстджын рауад. Бизнесментæн æххуысæн нæ бæстæйы уыцы иу рæстæг кусы цалдæр федералон æмæ регионалон программæйы. Зæгъæм, афæдз æмæ ‘рдæджы размæ Сæрмæт фæллой æмæ социалон рæзты министрады программæйы фæлгæты рамбылдта 250 мин сомы. Йе ‘нтыстытæ хынцгæйæ субсиди йæ къухы бафтдзæн фидæны аз дæр.
