Энергетикæйы къабазы тæккæ ногдæр мадзæлтты тыххæй фехъусын кодтой «Механотроника», зæгъгæ, фирмæйы кусджытæ Санкт-Петербургæй. Сæрмагонд конференци сарæзтой Цæгат Кавказы хæххон металлургон институты.
Студенттæй уæлдай дзы архайдтой хъахъхъæнынады заводы минæвæрттæ æмæ республикæйы энергетикæйы куыстуæттæ. Ацы къабазы ногдзинæдтæй спайда кæнынц энергон тых хъахъхъæныны объектты. Нырыккон нымæцон гæрзтæ хорзырдæм ахадынц æнæнхъæлæджы уавæрты рæстæг. Цæгат Кавказы хæххон металлургон институт æмæ «Механотроника» æмгуыст кæнынц къорд азты дæргъы. Компани уæлдæр ахуыргæнæндонæн æппынæдзух баххуыс кæны. Студенттæ Санкт-Петербургы ацæуынц практикæйы хуызы ахуыртæ. Уыимæ ма сын куысты бынæттæ дæр вæййы.
Алексей Зимовец, руководитель учебного центра ООО «НТЦ «Механотроника»: «Нæ компанийæн ахсджиаг у Цæгат Кавказы хæххон металлургон институтимæ архайын. Цæгат Кавказы федералон зылды æмгуыст кæнæм æрмæст ацы ахуыргæнæндонимæ. Фидæны дæр фæнд кæнæм нæ ахастдзинæдтæ сфидар кæнын, цæмæй дарддæр дæр æмгуыст кæнæм».
Ацамаз Кабисов, главный инженер филиала МРСК Северного Кавказа «Севкавказэнерго»: «Куыд нæ бæстæйы президент, афтæ республикæйы сæргълæууæг дæр иу æмæ дыууæ хатты нæ дзырдтой, нымæцон технологиты райрæзтыл кусын кæй хъæуы. Ацы къабазмæ раздæхтой уæлдай æргом. Парахат æй кæнынц бирæ куыстуæтты».
