Скъоламæ афойнадыл æрбацæуын æмæ фыццаджыдæр буары тæвд сбарын. Республикæйы ахуыргæнæндæтты санитарон ног домæнтæ бæрнонæй æххæст кæнынц. Ахуырадон уагдæтты сарæзтой æппæт дæр, цæмæй коронавирусы низ ма парахат кæна. Æмæ кæд скъолаты æнæниздзинады домæнтæ иууылдæр æххæст кæнынц, уæд æхсæнадон бынæттæ æмæ базарадон центрты та хъуыддаг æндæрхуызон у. Уæрæсейы фæлхасгæнджытæм цæстдарды управленийы кусджытæ сæ цæст дарынц, цæмæй адæм сæхи хъахъхъæной.
Фыццаджыдæр, скъолайы кæртæй бахизгæйæ, скъоладзаутæ æмæ ахуыргæнджытæн сбарынц сæ буары тæвд. Ахуырадон уагдоны ис 700 ахуырдзауы. Алчидæр сæ æрбацæуы сæрмагонд рæстæгмæ. Кæд ахуыртæ райдайынц 9 сахатыл, уæд скъоладзаутæ райдайынц цæуын 8 сахатæй.
Уымæй уæлдай ма скъоладзаутæ дихгонд æрцыдысты æртæ къордыл. Уый тыххæй байгом кодтой æртæ бахизæны. Райдайæн кълæстæн, астæуккаг æмæ хистæр. Скъолайы директор куыд бафиппайдта, афтæмæй скъоладзаутæм низы хатт никæмæ рабæрæг, уый та сæ ныййарджыты руаджы.
Ныр сывæллæттæ нæ, фæлæ ахуыргæнджытæ сæхæдæг цæуынц кълæстæм, алы кабинетмæ дæр. Санитарон домæнтæн иууылдæр æххæст кæнынц.
Кæй зæгъын æй хъæуы, Уæрæсейы фæлхасгæнджытæм цæстдарды управленийы домæнтæ иуыл республикæйы цæрджытæ не*ххæст кæнынц. Медицинон маскæтæ адæм се’ ппæт нал дарынц. æрмæст сæ иуæй-иутæ скæнынц. Сæрмагонд ведомствæйы кусджытæ аразынц рейдтæ базарадон центрты æмæ æндæр æхсæнадон бынæтты. Адæмæн сæ зæрдыл лæууын кæнынц, низимæ дарддæр дæр тох кæнын кæй хъæуы, уый.
Хæтæгты Магомед, РЦИ-Аланийы Уæрæсейы фæлхасгæнджытæм цæстдарды управленийы сæйраг специалист: «Коронавирусы низ кæй апарахат, уый тыххæй хъæуы къæрцхъусдæр уæвын. Раздæрау ницы аивта. Санитарон-эпидемиологон домæнтæ æххæст кæнын хъæуы. Кусджытæ хъуамæ дарой медицинон маскæтæ, уыимæ ма сæм уа антисептиктæ».
Транспорты хъуыддаг хуыздæр у, уый та – шофырты руаджы. Сæхæдæг æдзухдæр вæййынц медицинон маскæты, стæй ма сæм хицæнæй æвæрд ис, цы адæмы ласынц, уыдонæн дæр.
Промышленность æмæ транспорты министрад, паддзахадон автоинспекцийы кусджытимæ иумæ саразынц сæрмагонд рейдтæ æхсæнадон транспорт æмæ адæм фылдæргай кæм æмбырд кæныц, уым.
Ныридæгæн хъæуы æххæст кæнын æнæниздзинады æппæт домæнтæ. Сты рæстæгмæ æмæ, специалисттæ куыд зæгъынц, æрмæстдæр афтæмæй ис эпидемийы дыккаг уылæн бауромæн.
Марина Караева, Сабина Гатагова, Хетаг Гаппоев, Новости Осетии.
