Гæздæнты Гайтойы роман “Алыксандр Вольфы æндæрг”-ы хъайтартæ сдзырдтой иронау. Чиныг цалдæр азы размæ рацыд, фæлæ йæ йын абон адæмы размæ рахастой йæ аудиоформат дæр. Бакасти йæ Цæгат Ирыстоны адæмон артист Æлбегаты Алан. Презентацимæ æрбахуыдтой студенттæ æмæ скъоладзауты. Фæзминаг хъæппæрис кæмæ фæзынд æмæ йæ чи сæххæст кодта, уый радзурдзæн Дзæдзойты Фатимæ.
“Алыксандр Вольфы æндæрг”-ыл фæсарæйнаг рауагъдадтæ сæ цæст раджы æрæвæрдтой. 1950 азы рацыд англисаг æвзагмæ тæлмацгондæй Нью-Йорк æмæ Лондоны; 1951-æмы йæ ныммыхуыр кодтой францаг æвзагыл Парижы, 1952 азы Миланы италиаг æвзагмæ тæлмацæй, 1955-æмы та Барселонæйы — испайнаг æвзагыл. Æнусы ‘рдæгæй фылдæры фæстæ, 2021 азы, “Алыксандр Вольфы æндæрг” рацыд ирон æвзагыл. Проекты автортæ — Дзгойты Валерий æмæ Пухаты Олег. Ацы хъуыддагимæ сæ зæрдæтæ рагæй дзырдтой.
Проекты фæлгæты ма 2024 азы ирон æвзагыл рацыд чиныг “Изæр Клэрмæ”. Ныртæккæ ног дуг æркодта — цард згъоры, абухы. Чиныгмæ йе ‘ргом стæм здахы, уæлдайдæр та ирон чиныгмæ.
Чингуытæ ирон æвзагмæ ратæлмац кодта Цæгат Ирыстоны паддзахадон университеты ирон филологийы факультеты ирон литературæйы кафедрæйы доцент Безаты Фаризæ. “Гайтойы уацмыстæ кæсгæйæ, базонæн ис уырыссаг æвзаг цæй бæрц хъæздыг у, уый. Фæлæ сæ тæлмац куы кæнай, уæд ирон æвзаджы хъæздыгдзинад дæр бамбардзынæ!”— зæгъы Фаризæ.
Мадзал ацыд Гæздæнты Гайтойы номыл фæсивæдон чиныгдоны. Аудиочиныджы текст бакаст адæмон артист Æлбегаты Алан. Авторы сфæлдыстад æвзонгбонтæй фæстæмæ уарзы.
Гæздæнты Гайто райгуырд Санкт-Петербурджы. Парижмæ та афтыд 1923 азы. Йæ царды фылдæр хай уым арвыста. Эмигранты фыдцарды зындзинæдтæ æххæстæй бавзæрста, фæлæ йæ уды фарн тыхджындæр разынд. Йæ фæлгонцы баиу сты лæджы хуыздæр миниуджытæ æмæ раст уаид, уыцы фæзминаг миниуджытыл фидæны фæлтæрты хъомыл кæнын.
Гæздæнты Гайтойы тыххæй Советон Цæдисы дæргъвæтин рæстæг ницы зыдта уæрæсейаг чиныгкæсæг. Йе сфæлдыстадон бынтæ йын федта æрмæст 90-æм азты. Абон Канд Уæрæсейы нæ, фæлæ дунæйы æндæр бæстæты дæр йæ уацмыстæ мыхуыры цæуынц мингай чингуытæй. Фыссынц сыл зонадон куыстытæ — монографитæ æмæ диссертацитæ.
