Горæтгæрон районы цæрæг цæстфæлдахджыты фыццаг скодта 145 мин сомы. Ахæм сайд æрцыд 33-аздзыд сылгоймагыл.
Куыд радзырдта, афтæмæй йæм телефонæй æрбадзырдта æнæзонгæ нæлгоймаг, йæхи схуыдта банчы кусæг. Бафарста йæ, мыййаг, кредит исынмæ курдиат балæвæрдта æви нæ, уымӕй. Афтæмæй сылгоймагæй расайдтой банчы картæйы реквизиттæ. Цæстфæлдахæджы амындмæ гæсгæ, йæ чырæ телефоны банчы мобилон уæлæфтуаны руаджы йæхиуыл æнæнхъæлæджы баппæрста 150 мин сомы бæрц кредиты уаргъ. Йæхæдæг æй фыццаг зонгæ дæр нæ бакодта. Фæлæ йæм ногæй куы `рбадзырдтой, æмæ йе `нæрхъуыдыдзинады тыххæй æхца фыдгæнджыты хыгъдмæ куы арвыста, уæд йæ сайд дæр бамбæрста.
Ацы цау равзарыныл ныр архайынц барадхъахъхъæнджытæ. Æмæ ма радон хатт сидынц адæммæ, цæмæй уой къæрцхъусдæр, æнæзонгæ адæмыл ма æууæндой æмæ сын хи тыххæй информаци барвӕндӕй ма хъусын кæной.
