Кӕд æрыгон у, уӕддӕр Колыты Дианӕ ныридæгæн бацæттæ кодта бирæ наукон куыстытæ, алы здæхтыты у æнтыстджын. Ӕрӕджы чызджы къæбиц баххӕст æппӕтуӕрӕсеон ахуырадон конкурс “Финансовая нива”-йы раззагдæр бынатӕй. Ныртӕккӕ студенткӕ кӕны лабораторон иртасӕн куыстытӕ, цæттæ кæны, скъолайы кары сывӕллӕттӕн пайда продукци. Дианӕ йе ‘вӕрӕны тыххӕй ныр дыккаг хатт сси Уӕрӕсейы хицауады стипендийы хицау. Йӕ ныхӕстӕм гӕсгӕ, уый у ахсджиаг ӕххуыс ӕрыгон ахуыргӕндтӕн.
– Ацы стипенди ныр дыккаг аз райстон ӕмӕ мӕнӕн уый тынг ахсджиаг у, уымӕн ӕмӕ фыццаг аз стипенди райсдзынæн, ууыл мæ зæрдæ нæ дардтон. Дыккаг аз æй кӕй исын, уый та у, раст фӕндагыл кӕй цӕуын, уый æвдисæн.
Биотехнологийы факультеты студент Арташес Григорян зӕрдиагӕй архайы университеты ахуырадон ӕмӕ сфӕлдыстадон царды. Наукӕмӕ раст скъолайы сцымыдис. Ныртӕккӕ ӕвзонг лӕппу кусы диабетиктӕн продукцийыл. Йæ ног ӕрхъуыды — бататы ссæст. Арташесӕн хӕринаг кӕныны темӕ хӕстӕг у, уымӕн ӕмӕ колледжы хӕринаггӕнӕг-кондитерыл сахуыр кодта. Йӕ ӕнтыстдзинӕдты тыххӕй сси Уӕрӕсейы Федерацийы Президенты стипенди исӕг.
– Патент сарӕзтон кафедрӕйы доцент Дзантиаты Ларисӕимӕ “Герцогиня из батата”-йы рецептмӕ гæсгæ. Мах бакуыстам технологийыл, бацæттæ кодтам проект, бахъахъхъӕдтам æй ӕмӕ фӕстӕдӕр райстам патент.
Хицауады преми исæг ма у биотехнологийы факультеты студенткӕ Бесаты Элеонорӕ. Чызг зӕрдиагӕй архайы наукӕйы — фыссы уацтӕ, вæййы конкурсты ӕмӕ конференциты. Йӕ зонындзинӕдтӕй пайда кæны практикæйы. Лабораторийы чызг кӕны алыхуызон иртæстытæ. Ныртӕккӕ йӕ ахуыры сӕйраг темӕтæ сты, мӕр хъацӕн кӕнынӕн цы микроорганизмтӕ хъӕуы, уыдон.
– Рӕстӕгимӕ мӕр хъӕуы ӕфсадын, хъӕздыг кӕнын микроэлементтӕй, уымӕ гӕсгӕ нӕ ног фæрæзтæ ӕххуыс кӕндзысты нӕ мӕрӕн, цӕмӕй йӕ хӕрзхъӕддзинад хуыздӕр уа ӕмӕ йӕ тыллӕг фылдӕр кӕна.
Ӕдӕппӕтӕй ацы аз Уӕрӕсейы президенты ӕмӕ хицауады стипенди райстой Хӕххон аграрон университеты 17 студенты. Се ‘ппӕт дӕр раззагдæр сты ӕхсӕнадон ӕмӕ наукон архайды. Бӕрзонд
хорзæх та у ӕрыгон иртасджыты ӕнтыстыты бæрæггæнæн.
– Нӕ студенттӕ – магистранттӕ, аспиранттӕ -уыдон ӕхсызгонӕй сæхи фæлварынц иртасӕн куысты, уыимæ архайынц, цы бӕрӕггӕнӕнтӕ райстой, уыдонӕй практикæйы спайда кӕныныл, сӕ иртасӕн куыстытӕн сын скодтой стыр аргъ, ома уавӕртӕ, куыст иртасынӕн ӕмӕ рӕзынӕн.
Æрыгон иртасджытӕн разӕй ис ног хынцинæгтæ ӕмӕ ӕнтыстдзинæдтæ, цы ӕххуыс сын кӕнынц, уый та сын суыдзӕн уӕлӕмхасӕн фӕрӕз размæ тырынынæн.
