Специалистты æргом здæхт у чысыл монитормӕ. Дохтыртӕ кӕнынц ретроградная интраренальная литотрипсия, кæй хонынц, уый. Æнцондæр æй куы зæгъæм, уæд — уыргтӕ ӕмӕ мизгвæдæй дуртӕ исынц чысылинвазивон хуызы. Операцигӕнӕн стъолыл 15-аздзыд чызг. Ахӕм процедурæ æнахъомæн республикӕйы фыццаг хатт кæнынц. Раздӕр-иу ахӕм низимӕ сывӕллӕтты ӕндӕр регионтӕм æрвитын бахъуыд. Республикӕйы медицинон кусæндæтты хъӕугӕ ифтонггарз нӕ уыд.
Пациенткæмæ низ фыццаг хатт раиртæстой 5 аздзыдæй. Уӕд къухы бафтыд ремиссимӕ рацӕуын, уый фæстæ сывæллоны рыстытæ нæ тыхсын кодтой 10 азы. Фæлæ раст ног азмæ хæстæг низ ногæй стыхджын. Ӕнахъом бахауд сывæллæтты республикон клиникон рынчындонмæ, уым арвыста бæрæгбæттæ дæр. Сывӕллонæн операци ӕнӕмӕнг хъуыд ӕмӕ йын хӕдзары йӕ сӕххӕст кӕныны фадатæй бинонтӕ спайда кодтой.
Операци ӕххӕст кодта дæсныты командӕ. Се ‘хсæн дохтыр-уролог Маликъиты Ибрагим ӕмӕ сывæллæтты республикон клиникон рынчындоны сывӕллӕтты урологи-андрологийы хайады сӕргълӕууӕг Асхаб Шидаев. Процедурæйæн сахатӕй къаддӕр бахъуыд. Сæрмагонд зонӕйы операцийы фӕуынмӕ ӕнхъӕлмӕ кӕсынц ныййарджытӕ. Специалист йӕ хӕдфӕстӕ рацӕуы хиуӕттӕм, ӕмӕ, арæхдæр, хорз хабӕрттимӕ.
Дарддӕр чызгмæ æнхъæлмæ кæсы дæргъвæтин реабилитаци. Фӕлӕ æппæты зындӕр къӕпхӕн кæронмæ æрхæццæ. Мизгвæды низ сывӕллӕтты ‘хсӕн, хъыгагӕн, парахат у, зæгъынц специалисттӕ. Фӕлӕ ныр фарстаимæ хирургион фæрæзтæй тох кӕнӕн ис, уыимæ республикӕйы арӕнтӕй нӕ ахизгӕйӕ.
Калманты Зæлинæ, Лаура Марышева
