Хъæууон хæдзарад, æнæниздзинадхъахъхъæнынад, бизнесы минæвæрттимæ фембæлд. Республикон парламенты æмбырд ацы хатт арæзт æрцыд Æрыдоны районы. Спикер Тускъаты Таймураз бабæрæг кодта цалдæр социалон ахсджиаг объекты.
Аив, нырыккон æмæ сæйрагдæр удæнцой уавæртимæ бынат. Ахæм хуыз бындурон рацарæзты фæстæ райста Нартыхъæуы сывæллæтты рæвдауæндон. Специалисттæ дзы баивтой электрон тыхы системæ, дуæрттæ, цартæ, æрхъуыды кодтой цымыдисаг дизайн. Алцыдæр паддзахадон программæ «Хъæуты территориты комплексон райрæзт»-мæ гæсгæ. 40 сабийæн дзы бакуыстой полилингвалон ахуырадыл. Тускъаты Таймуразæн бæстон радзырдтой ахуырты хæрзхъæддзинадмæ цæстдарды тыххæй.
Æрыдоны районы центрон рынчындон сменæмæ исы 300 адæймаджы. Медицинон кусæндон лæггад кæны Дыгуры, Æрæфы, Алагиры, Кировы æмæ Рахизфарсы районты цæрджытæн. Пациенттæн ам бакæнынц амбулаторон æмæ стационарон æххуыс. Нацпроект «Æнæниздзинадхъахъхъæнынад»-мæ гæсгæ самал кодтой æппæт хъæугæ кусæнгæрзтæ. Уымæй уæлдай ма дзы кусы МРТ, ивгъуыд аз та ма сæм фæзынд компьютерон томографийы кабинет.
Æрыдоны район ис раззагдæр бынаты базарадæн кæсаг уадзыны хъуыддаджы. Балергæсаджы хæдзарады хъомыс æртæ азмæ дзæвгар фæфылдæр. Ам сæйрагдæрыл нымайынц продукцийы хæрзхъæддзинад. Æппынæдзух сæ цæст дарынц холлаг æмæ доны уавæрмæ. Уæлдайдæр та экологимæ. Территори ифтонггонд у механикон сыгъдæггæнæн системæйæ, цæмæй æрдзон донуаттæ ма чъизи кæной.
Дарддæр бизнесы райрæзтыл спикер æрдзырдта районы амалхъомтимæ фембæлды. Цы фарстатæ сæ тыхсын кодтой, уыдон фехъусын кодтой, радзырдтой сæ æнтыстдзинæдты тыххæй. Цымыдис сæ кодта ацы аз цавæр æххуысмæ æнхъæлмæ кæсой, уый. Риссаг фарстаты ‘хсæн кадртæй цухдзинад. Хорз специалист ссарын ныртæккæ зын у. Арæх сæ фæхонын бахъæуы æндæр регионтæй. Тускъаты Таймураз фæнысан кодта, ацы хъуыддаг домы бындурон æркаст.
Ахуырады къабазы æнтыстдзинæдтæ дæр чысыл не сты. Ивгъуыд аз районы олимпиадæты архайдта 2 мин сывæллоны. Сæ фылдæр систы призертæ. Районы разамынд уæлдай æргом здахы фæсивæды патриотон хъомыладмæ. 2024-æм азы ам сарæзтой 188 мадзылы, бабæрæг сæ кодтой 30 мин адæймаджы. Ныртæккæ дæр ахсджиаг бонтæ бæрæг кæнынц. Концерттæ, равдыстытæ, фембæлдтытæ иууылдæр нысангонд сты Стыр Уæлахизы 80 азы бонæн. Цæрджытæн цæттæ кæнынц удæнцой уавæртæ. Нацпроект “Жилье и городская среда”-мæ гæсгæ Æрыдоны зилынц дыууæ объектмæ, паддзахадон программæ «Хъæуты территориты комплексон райрæзт»ы фæлгæты бындуронæй цалцæг кæнынц спорткомлекс æмæ скъолатæ.
Ацы азы сæйраг нысантæ дæр æнæивгæ сты. Уæлдай æргом здахын районы социалон-экономикон райрæзмæ. Парламенты уæнгтæ æппынæдзух фæнысан кæнынц бынаты ахæм фембæлдтытæ пайда кæй сты, уый. Афтæмæй фарстатæ æвæстиатæй иуварсгонд æрцæуынц.
