Фыццаг телеконкурс «Фæндырмæ» балæууыд Хуссар Ирыстоны. Стырæй чысылæй, не `фсымæрон сыхæгтæ сæ фæлтæрддзинад фæндырыл цæгъдынæй равдыстой жюрийы уæнгтæн. Конкурсы архайджытæ кæрæдзийы хуызæн не сты. Чи дзы райгуырæн бæстæйы кад бахъахъхъæнынмæ æрбацыди, кæмæдæр ахсджиаг кæсы йæ курдиат равдисын, чи та фæнд кодта йæ тыхтæ бавзарын. Къæдзæхрагъы сæрты араст ис ме`мкусæг Къуымæллæгкаты Фатимæ дæр. Ацы хатт йæхи бафæлвæрдта хабæртты уацхæссæгæй æмæ йын куыд бантыст, уымæ бакæсæм.
Дыууæ мæймæ нæ телеканалы арæзт сфæлдыстадон конкурс «ФÆНДЫрМÆ» нæ республикæйы цы районæй нæ рацагъта, иу ахæм нал баззад. Ныр ахызт Кавказы къæдзæхрагъы сæрты æмæ æрфысым кодта Хуссар Ирыстоны. Ирд хуры тынтæй рæвдыд зæхх курдиатджын адæмæй цух никуы уыд. Сæ хуыздæрты равзарынмæ нын баххуыс кодта Хуссар Ирыстоны сгуыхт артисткæ Саппиаты Зæлинæ.
Æвзарæн тур цыдис концертон зал «Чермен»-ы. Уым æрæмбырд сты паддзахады сæрæндæр фæндырдзæгъдджытæ. Æдæппæтæй баисты 13. Профессионалон къамис æркаст музыкантты æнгуылдзты змæлдмæ, сæ фæндырты тæнты зæлтæм. Зæгъын хъæуы уый, æмæ архайджытæн сæ фылдæр нæлгоймæгтæ кæй уыдысты. Сæ фæндтæ дæр, æвæццæгæн, уымæн афтæ уæлæрвтыл æрзылдысты.
Дыууæ Ирыстоны культурæйы кусджытæ рагæй дæр кæрæдзимæ æфсымæрон зæрдæ дарынц. Ныр дæр та афтæ. Цæгатаг конкурс Хуссары афтæ хорз кæй сфидыдта, уый руаджы бæрæгбон рауад æнтыстджын æмæ зæрдæмæдзæугæ.
Цалынмæ йæ фырт сценæйыл уыдис, уæдмæ Цхуырбаты Игорь катай кæны. Йæ цард ыл йæ уæз æххæстæй æруагъта. Йæ цоты иунæгæй хъомыл кæны. Фæлæ Игорь йæ хæстæ иуæй-иу сылгоймагæй дæр хуыздæр æххæст кæны. Йæ фырт Илья уымæн æвдисæн. Цæгъды фæндырæй, кафы, зары, фæсарæйнаг æвзаг ахуыр кæны æмæ ма цæуы боксмæ дæр.
Æркасты радон къæпхæн рабæрæг кодта бирæ курдиатджын фæсивæды Хуссар Ирыстоны. Æгайтма нæ телекомпанийы минæвæртты балц æнæнысан нæ рауад. Кæд хуссарæй исчи уæлахиздзау суа, уæд уый – æхсызгон хабар. Уый та рабæрæг уыдзæн конкурсы кæронбæттæн къæпхæны. Цæудзæн Дзæуджыхъæуы 28-29-æм мартъийы.
