Атайты Аннæ мидбылхудгæ лæмбынæг кæсы скъолайы альбомтæм. Æхсызгонæй агуыры йе ‘мкъласонты уарзон цæсгæмттæ. Мæнæ уал иннæ къласæй Иринæ ссардта, дарддæр химийæ йæ хуыздæр ахуыргæнæг. 43 азы рацыдис. Раст цыма знон уыд скъолайы рауагъдон, цыма йæ хæлæрттимæ хæрз æрæджы тагъд кодтой уроктæм, сæхи цæттæ кодтой фæлварæнтæм.
Скъолайы 100 азы юбилеймæ Атайты Аннæ сæрмагондæй Мæскуыйæ ссыд. Æхсызгонæй æрзылд скъолайы къуымты, уарзон кълæсты. Æрымысыд йæ æрыгон æнæмæт бонтæ. Скъолайы юбилей сбæрæг кæнынмæ æрбацыдысты хъæуы цæрджытæ. Уыдонæй се ‘ппæт дæр сæ дыккаг хæдзарыл нымайынц.
Скъола кусын райдыдта суанг 1924-æм азы. Уæдæй нырмæ рауагъта къорд фæлтæртæ. Ам фæсивæдæн æххуыс кæнынц сæ царды фæндаг ссарынмæ. Ахуыргæнджытæ, дохтыртæ æмæ спортсментæ. Сæ иу — Салхъазанты Таймураз – дунейы чемпионатты призер, Европæйы цыппар хатты чемпион. Йæ райгуырæн хъæуы йæм ныр æнхъæлмæ кæсынц олимпаг майданимæ.
Сындзыхъæуы скъолайы ахуырдзаутæ бацæттæ кодтой концерт. Кæфтытæ, театралон равдыстытæ æмæ зарджытæ. Дарддæр кадджын уавæры бакастытæ скъола, хъæу æмæ республикæйы ном чи айхъуысын кодта, уыдоны нæмттæ. Ацы бынат скъолайы рауагъдонтæн у зæрдæйæн уарзон, скъолаимæ у баст сæ цард. Бирæтæн сæ бон не сси бæрæгбоны уæвын. Фæлæ зæрдæйæ уыдысты ам. Инæлар-лейтенант, Уæрæсейы хъайтар Миндзайты Михаил æрбарвыста телеграммæ. Арфæйы ныхæстæ бакаст скъолайы директор.
Юбилей æнæмæнг хорз фадат у скъолайы хъæздыг истори æрымысынæн. Сындзыхъæуæн бæрæгбон у иумæйаг æмæ ахсджиаг бон, сæйрагдæр та сæ истори.
