Цæгат Ирыстоны абон сбæрæг кодтой Хетæгкаты Къостайы 160 азы юбилей. Кадджын мадзæлтæ райдыдтой райсомæй æмæ цæуынц ныр дæр ма. Сæ сæйрагдæртæ абон ацыдысты ирон литературæйы бындурæвæрæджы райгуырæн хъæу – Нары. Республикæйы районтæ бацæттæ кодтой сæрмагонд поты -фæз национ хæринæгтæ æмæ дзауматæ национ нысæнттимæ. Бæхты театр «Нарты» иу хатт ма равдыста спектакль «Бæрæгбон Хæхбæсты». Мариинаг театры филиал дæр бацæттæ кодта равдыст. Нæлгоймæгты хор акодта Къостайы æмдзæвгæтыл фыст зарджытæ. Иу дзырдæй, æцæг бæрæгбон уыд Нары.
Рагон мигæнæнтæ æмæ хæринæгтæ. Къухæй конд алыхуызон дзаумæттæ æмæ нывтæ. Нæ республикæйы алы район дæр Къостайы юбилеймæ йæхи бæстонæй бацæттæ кодта. Бæрæгбоны уазджыты сцымыдис кодтой, Къостайы заманты цы дзуамæттæй пайда кодтой, уыдоны равдыстæй.
Алагиры, Æрæфы, Дыгуры, Рахизфарсы æмæ Мæздæджы районтæ абон зæрдиагæй бацархайдтой бæрæгбон срæсугъд кæныныл. Равæрдтой цымыдисаг дзуамæттæ хъæдæй æмæ æндæр æрмæджытæй арæзт. Уыимæ ма, уазджытæн сарæзтой дæсныйад æвдисæг ахуыртæ. Алкæй бон дæр уыд национ кукла барæвдз кæнын, кæнæ æлыг æмæ хъæдæй дзаума хи къухæй саразын. Рахихфарсы район ма, суанг раджы заманты сылгоймаг сывæллон куыд хъомыл кодта, уый дæр равдыстой. Къостайы фæлгонц дæр ирдæй равдисыныл бацархайдтой. Уæдæ Хъуыбадыйы дæр æд хъисын фæндыр уазджытæ федтой. Алы ран дæр хъæлдзæг ирон зарджытæ æмæ кæфтытæй уазджыты зæрдæтæ рæвдыдтой.
Бæрæгбоны уазджыты ‘хсæн уыд нæ республикæйы сæргълæууæг Битарты Вячеслав æмæ Хуссар Ирыстоны президент Бибылты Анатолий. Алы районы минæвæр дæр уазджыты йæ фæзимæ базонгæ кодта, базонгæ кодта районы æнтыстдзинæдтимæ. Алы районы фæзы бæркадджын фынгæй акомдзаг кодтой. Стæй бæрæгбоны фæдыл æппæт адæмæн дæр зæрдæбын арфæтæ ракодтой. Тынг æхсызгон сын уыд, афтæ бæстонæй сæхи кæй бацæттæ кодтой бæрæгбонмæ.
Бибылты Анатолий куыд фæбæрæг кодта, афтæмæй Къостайы æвæрæн ирон адæмы иудзинадмæ у æгæрон. Абон ирон адæмæн уыцы иудзинад дарддæр хæссынæн ис æппæт фадæттæ дæр.
Бæрæгбоны фæдыл ма уазджытæн бацæттæ кодтой цымыдисаг концертон программæ. Бæхты паддзахадон драмон театр «Нарты» равдыста музыкалон-поэтикон спектакль «Бæрæгбон хæхбæсты». Архайдтой дзы ирон академион театры артисттæ, ЦИПУ-йы театралон факультеты студенттæ, стæй аивæдты колледжы студенттæ. Спектакль бацæттæ кодтой Къостайы юбилеймæ. Йæ сæйраг мидис у – адæмы иудзинад.
Бæрæгбон ма сæ кæфтытæй барæсугъд кодтой паддзахадон ансамбль «Алан»-ы артисттæ. Бæрæгбон рауад цымыдисаг æмæ егъау. Æрбангом кодта тынг бирæ адæм куыд нæ республикæйы алы къуымтæй, афтæ æндæр регионтæй дæр. Се’ппæт дæр бæрæгбонæй разыйæ баззадысты.
Нары абон æрæмбрыд сты алы кары адæм. Иу сæ кæны Къостамæ уарзондзинад. Йе сфæлдыстадæн ын кæнынц стыр аргъ. Се ‘хсæн бирæтæсты скъоладзаутæ.
Бæрæгбоны уазджытæ се ‘ппæт дæр хæст сты иу хъуыдыйыл- Къоста у Ирыстоны ирддæр стъалы. Йæ ном æмæ сфæлдыстадæн рох гæнæн нæй.
Хуасдзауты Алинæ
