Хицауады радон æмбырд уыдис абон Дзæуджыхъæуы. Фыццаджыдæр, ныхас кодтой, йе сконды цы ивддзинæдтæ `рцыд, уыдоныл. Афтæ Цæгат Ирыстоны бастдзинад æмæ информацион технологиты комитеты сæргълæууæджы хæдивæгæй сæвæрдтой Хъуылаты Маринæйы. Тимур Серокуровы та фæстæмæ снысан кодтой паддзахадон цæрæнуæтты æмæ архитектурон-арæзтадон цæстдарды разамонæджы хæдивæгæй.
Дзырдтой ма информацион технологиты райрæзтыл, амайæг организацитæм æнæрадон цæстдардыл, сидзæр сывæллæтты бартæ хъахъхъæныныл. Дзырдæн зæгъæм, уыдонæн сæ бон уыдзæн 5 азы `мгъуыдмæ социалон цæрæнуат хаццоны исын æнæнымæц хатты. Раздæр сын ахæм мадзал лæвæрдтой æрмæстдæр иу хатт.
Ног фæткы тыххæй фехъусын кодта фæллой æмæ социалон райрæзты министр Хуыбаты Барис.
Хицауады уæнгтæ ма дзырдтой спорты тыххæй дæр. Нæ республикæйы физкультурæ æмæ спорты министр Гæбулты Владимиры ныхæстæм гæсгæ, боксæй чемпионаты йæхи хуыздæр чи равдиса, уыдоны дæр æнæрхъуыдыйæ нæ ныууаддзысты. Фыцаг бынæтты тыххæй райсдзысты 50-гай мин сомтæ, 2-аг æмæ 3-аг бынæтты тыххæй та – 30-гай æмæ 20-гай мин сомтæ.
Нæ республикæйы вице-премьер Томайты Ирбеджы ныхæстæм гæсгæ, хæцæнгарз æмæ рæмудзæнтæ барвæндонæй чи радта, уыдонæн сæ фиддонтæ дæр фæфылдæр уыдзысты. Республикæйы бюджеты уый тыххæй амынд ис 500 мин сомы.
