Хоккейон командæ «Алайнаг барс»-тæ равдыстой радон æнтыстдзинад. Ацы хатт Армавирæй Ирыстонмæ сластой бронзæ майдантæ. Уым сæрмагонд турниры æвзонг спортсментæ фæуæлахиз сты 4 хатты, фæлæ буллиттæм гæсгæ сын рамбулын нæ бантыст. Уæвгæ æрхæндæг нæ кæнынц. Сæхи равдисын æмæ фыццаг бынат райсыны фадат сын уыдзæн дыууæ къуырийы фæстæ.
Зын тактикон нывтæ, арæхстджын архайд, сæрæн хъазт. Алы тренировкæйы дæр бæстон архайд. Ихыл быргæйæ фæллад уадзынæн æрыгон спортсментæн рæстæг нæй. Цæмæй командæ фæуæлахиз уа, уый тыххæй хъæуы æмгуыст кæнын.
Дзæуджыхъæуккаг «Алайнаг барс»-ты сæрæнгуырдтæ æрæджы бацахстой æртыккаг бынат Армавиры турниры. 6 хъазтæй рамбылдтой 4. Фæстаг дыууæ фæхæрд сты буллиттæм гæсгæ. Ерысты кæронбæттæн дыууæ хъазæджы райстой сæрмагонд лæвæрттæ.
Сæйрагдæр уый у, æмæ лæппуты уæлахизмæ разæнгард кæнын нæ фæхъæуы, зæгъы «Барс»-ты тренер Юрий Черных. Æвзонг хоккеисттæ дарддæр кусдзысты сæ техникæйыл. Уыимæ тагъд рæстæджы республикæйы фæзындзæн ихылбырæн ног фæз. Хуыздæр уавæрты та ног бæрзæндтæм хизын уыдзæн æнцондæр.
Тренеры ныхæстæм гæсгæ, æртыккаг бынат æвзæр бæрæггæнæн нæу, фæлæ лæппутæ тырнынц хуыздæр суæвынмæ. Сæхи цæттæ кæнынц ног ерыстæм. Ацæудзысты Ессентукийы 15-æй 18 декабрмæ. Уырны нæ, ацы хатт фыццаг бынат Алайнаг фыранкты кæй уыдзæн, уый.
