Ныфсхаст æмæ хъæбатыр, йæ къухты та æрмæст ирон тырыса æмæ æнæ нæмгуытæй хæцæнгарз. Афтæмæй æрыгонæй йæ цард адæмы сабырдзинадыл радта Хуыгаты Радислав. Фондз метры бæрзæндæн бронзæ монумент æвæрд æрцыд Къуыдаргомы алæмæты хæхты бынмæ, Къуайсайы, хæстоны чысыл Фыдыбæстæйы.
2022-æм азы Хуыгаты Радиславыл æмæ иннæ æфсæддонтыл знаг хинæй рацыд. Ныхмæлæуды рæстæг йæ дыууæ хæлары уæззау цæф фесты. Радислав сын йæхæдæг бакодта фыццаг медицинон æххуыс. Знаг хæстæг кæй у, уый æмбæрста. Йæ хæстон æмбæлтты цард бахъахъхъæнынæн йæхи раппæрста знаджы ‘рдæм йæ къухы бæрзонд систа æппынæдзух йæ зæрдæйы бын цы ирон тырыса дардта, уый. Не ‘мзæххон цы лæгдзинад равдыста, уый тыххæй базыдта æппæт дуне дæр.
Фыдыбæстæмæ уарзондзинад, патриотизм æмæ лæгдзинад. Ацы миниуджытæ лæппуйæн зонгæ уыдысты сабийæ фæстæмæ. Алкæддæр хицæн кодта йæ сæрæндзинадæй. Йæ зæрдæйы йын стыр фæд ныууагътой 2008-æм азы цаутæ. Уыдон ын фæхъæддых кодтой йæ миддуне. Хистæрнæн коммæгæс, кæстæртæн хорз хæлар, ахæмæй зыдтой Радиславы.Йæ фыд Вадимы мысинæгтæм гæсгæ, Радислав бирæ уарзта цуаны цæуын, уый та уымæн æмæ иу ын уæд фадат уыд хæцæнгарзæй архайын.
Хуыгаты бинонтæ Цæгат Ирыстонмæ куы ралыгъдысты, уæд Радислав нырма скъоладзау уыд. 2007-æм азы йæм фæсидтысты æфсадмæ, фæстæдæр службæ кодта Грознайы, уыд командыгæнæг. Хуссар Ирыстонмæ фæстæмæ куы сыздæхт, уæд та йæ службæ адарддæр кодта Уæрæсейы 4-æм æфсæддон базæйы. Уырдыгæй йæ арвыстой Ростовмæ. Сæрмагонд æфсæддон операцийы архайдта фыццаг бонтæй фæстæмæ.
Ацы зарæг Лалыты Альберт ныффыста йæ хорз æмбалыл. Хæларзæрдæ æмæ йæ райгуырæн зæххыл иузæрдион, баххуыс кæнынмæ алкæддæр цæттæ, хъæлдзæг æмæ рæстуд адæймаг. Афтæмæй йæ бахъуыды кодтой йæ хæстæг адæм. Радислав æцæг хæлар сси æфсæддонтæн дæр. Тохы быдыры дæр сæ иу æнкъард кæнын нæ уагъта. Йæ хъæлдзæг ныхæстæй сæ иу ныфс бауагъта.
Радиславимæ бастдзинад куы фесæфт, уый Лалыты Альберт хорз хъуыды кæны.
Радиславы сгуыхтдзинад æрбангом кодта Хуссар Ирыстоны цæрджыты. Кадджын мадзалмæ сæмбæлдысты сæдæгай адæм.
Хъайтарæн цыртдзæвæн сæвæрдтой скъоладзау Хуыгаты Аннæйы хъæппæрисмæ гæсгæ.
Хъуыдыйы ‘вварс рахæцыдысты горæты цæрджытæ иууылдæр. Сæ курдиатимæ Хуыгаты мыггаджы минæвæрттæ фæсидтысты зындгонд скульптор, Цæгат Ирыстоны сгуыхт нывгæнæг Хайты Ибрагиммæ. Куыст æнцон нæ уыд, зæгъы специалист. Монументыл архайдта афæдзы ‘рдæджы бæрц. Хуыгаты Радислав йæ хъайтардзинадæй йæ ном æнустæм бафыста историйы.
