Аив хуыз, зæрдæмæдзæугæ нывтæ æмæ фæлмæн гæххæт. Абеты ног дизайнмæ кæсынæй цæст не ‘фсæды. Ахæм хæдхуыз стиль сывæллæтты фылдæр цымыдис кæндзæн, зæгъы аивæдты училищæйы рауагъдон Хъуысаты Ланæ.
Дипломы темæ педагог Яна Пустовая хуымæтæджы нæ равзæрста. Ирон æвзаг æмæ культурæ бахъахъхъæнын ахсджиаг хæс у. Егъау куыст – æппынæдзух эскизтæ ногæй-ногмæ ныв кæнын, эксперттимæ æмархайд, хъæугæ хуызтæ равзарын — æппæтæн бахъуыд дыууæ мæйæ фылдæр. Куыд хатдзæг – автортæ æмæ къамис разыйæ баззадысты.
Ахæм куыстæн ахуырдзау равзарын æнцон нæу. Педагог хъуамæ æнæмæнг æркæса студентты гæнæнтæ æмæ арæхстдзинæдмæ, зæгъы Яна Поставая. Фæлæ Ланæйыл дызæрдыг нæ кодта. Йæ нывты баиу сты фыдæлты культурæ æмæ нырыккон стиль. Бæрнондзинад, сæйрагдæр та лыстæгдзинæдтæм лæмбынæг ахастдзинад ын баххуыс кодтой диплом иттæг хорз бахъахъхъæнын.
Сыфты хуыз – фæлурс. Кæй зæгъын æй хъæуы, урс гæххæтыл сывæллæттæн фыссын æнцондæр у. Æмæ кæд искуы ацы дизайнæй парахатæй пайда кæной, уæд æм санитарон цæстдарды службæ ивддзинæдтæ бахæсдзæн. Сæйрагдæр уый у æмæ скъоладзаутæн цымыдисаг у уынын стыр нывтæ, дамгъæтæ æмæ дзырдтæ. Афтæмæй цæстытæ дæр фæллайгæ нæ кæнынц.
Ног дизайн саразынмæ чызджы сразæнгард кодтой Советон Цæдисы рæстæджы чингуытæ. Училищæйы директор Хетæгкаты Аслан лæмбынæг каст куыстыты алы къæпхæнмæ дæр. Куыд нывгæнæг æххуыс кодта æмæ амыдты рауагъдонæн. Ныр Ланæ бахауд Мæскуыйы культурæйы институты графикæйы хайадмæ. Гæнæн ис æмæ искуы йæ куысты хатдзæгтæй пайда кæндзысты республикæйы æппæт скъолаты æмæ сывæллæтты рæвдауæндæтты. Ныр та уал чызг дарддæр йæ рæзтыл архайы.
