Будайчиты Мæдинæ ног зонындзинæдтæ исы рæзты тæлмы медицинон къласы, фидæны йæ фæнды дохтыр суæвын. Сабийæ дæр куклатæй нæ хъазыд, арæхдæр йæ рæстæг æрвыста бынæттон рынчындоны, йæ мадмæ куысты рæстæг æнхъæлмæ кæсгæйæ. Ныр чызг ахуыр кæны профилон литературæ. Хорз æй æмбары цы фæндаг равзæрста, уый æнцон кæй нæу, уый. Уымæ гæсгæ ахсджиаг у хи цæттæ кæнын.
Балаты Джабраил та равзæрста æфсæддон хъуыддаг. Афæдзы размæ ард бахордта æмæ сси æрыгон арæнхъахъхъæнæг. Кадетон къласы цæуы цæттæгæнæн ахуыртæ. Уымæй уæлдай ма, ам фæсивæдæн амонынц квадрокоптертæн разамынд дæттын, аласынц сæ арæнтæм дæр. Уым бæстонæй ахуыр кæнынц территори, мæр æмæ фæткхалджыты фæдтæ. Мæйы кæрон сæм æнхъæлмæ кæсы цымыдисаг балц Мæскуымæ. Фембæлдзысты арæнхъахъхъæнæн æфсæдты управленийы кусджытимæ.
Ног коридортæ, кабинеттæ æмæ хъæугæ фæзуаттæ. Сывæллæттæн ис æппæт ифтонггæрзтæ дæр, актон æмæ тренажертимæ залтæ. Фæсивæд ахуыр кæнынц алыхуызон профилтæм гæсгæ. Ис дзы медицинон, педагогон, кадетон, арæнхъахъхъæнæн æмæ æнæнхъæлæджы уавæрты министрады кълæстæ. Специалистты ныхæстæм гæсгæ, афтæ æнахъомтæн уыдзæн æнцондæр фидæны дæсныйад равзарын.
Ис ма сын сæхи музей дæр. Байгом æй кодтой “Успех каждого ребенка” регионалон проектмæ гæсгæ, национ проект “Ахуырад”-ы фæлгæты. Скъолайы гæнæнтæ рæзынц. Ам фæнд кæнынц ноджы фылдæр мадзæлттæ аразан. Уый тыххæй та сын ис æппæт уавæртæ дæр.
