Къаболаты Беллӕйы фыццаг стыр роль. ЦИПУ-йы актерты хайады рауагъдон хъазы Лев Толстойы пьесӕмӕ гӕсгӕ ӕвӕрд “Власть тьмы”-йы сӕйраг архайджытӕй иуы. Анисия — 32-аздзыд зӕхкусӕг сылгоймаг, ӕнамонд, фӕлӕ уыимӕ ӕгъатыр ӕмӕ æдзæстуарзон.
Фӕлӕ, хъыгагӕн, уæддæр амондджын не сси. Драмӕ дзуры, иу адӕймаг цы ми бакодта, уый уӕззау фыдракæндтæ куыд расайын кодта, хъайтары миддунейыл кæй сахадыта, йе ‘фсармы сӕфтмӕ ӕмӕ уый фӕстӕ фӕсмонмӕ куыд ӕркодта, ууыл.
Ацы аз факультет уадзы авд профессионалон актеры Ирон театрӕн. Уый у студентты дыккаг ӕмбырд. Фӕсивӕдӕн ахуыр кӕныны фӕрӕзтӕ радта ӕхсӕнадон архайӕг Хӕдарцаты Махарбег.
Режиссер Цӕгӕраты Русланы æвӕрд хицӕн кӕны арф мидисæй. Спектаклы архайынц алы азты рауагъдонтӕ, ӕмӕ йӕ уый кӕны канд ахуыры фӕндаджы кӕронбӕттӕн нӕ, фӕлӕ актерты фӕлтӕрты ‘хсӕн иудзинад дӕр.
Ацы постановкæ у ахадгӕ цау канд студенттӕн нӕ, фӕлӕ Цӕгат Ирыстоны ӕппӕт культурон цардӕн дӕр.
Алина Гостева, Гаглойты Артур
