Сывæллæтты сфæлдыстады галуан ныр 16-æм хатт æрбамбырд кодта ирон æвзагыл чи зары, уыцы фæсивæды. 100 лæппу æмæ чызджы азарыдысты 60 алыхуызон композицийы. Æппæты кæстæр конкурсанттыл цæуы 6-гай азтæ. Мадзалæй — Дзæдзойты Фатимæйы æрмæг.
Змейкæйы 1-æм скъолайы кадетты уадынгæрзты æххуыс нæ хъæуы, æппæт зæлтæ дæр — сæхи хъæлæстæй. Фарæстæмкъласонты къорд — интернационалон. Хуыбылты Айсанæйæн йе ‘мбæлттæй чи уырыссаг, чи немыцаг у, фæлæ Къостайы зарæг æппæт дæр хорз сисынц иронау.
Æмæ амæй ай хуыздæр æвзонг зарæггæнджытæ конкурс “Ацæмæзы уадындз” æрбамбырд кодта 100-йæ фылдæр. Се ‘хсæн куыд солисттæ, афтæ вокалон къордтæ æмæ дуэттæ дæр.
Конкурс “Ацæмæзы уадындз” ныр арæзт цæуы 16-æм хатт. Сæйраг нысан — адæмон зарæджы аивады хуыздæр традицитæ бахъахъхъæнын. Мадзаларазæг у Хъæбæлоты Билары номыл сывæллæтты сфæлдыстады республикон галуан, Цæгат Ирыстоны ахуырад æмæ наукæйы министрады æххуысæй.
Боны дæргъы галуаны сценæйæ азæлыд 60 зарæджы бæрц. Æппæтæй хистæр архайджыты кар — 20 азы, кæстæртыл та цæуы 6-гай азтæ.
Архайджыты цæттæдзинадæн аргъ скæндзæн бæрнон жюри — аивад æмæ ахуырады зындгонд архайджытæ Икъоты Тинæ, Мамыхъаты Людмилæ, Хъæцмæзты Владимир, Габуты Светланæ. Уыдон хæстæг рæстæг кадджын уавæры фехъусын кæндзысты ацы аз æркастмæ йæхи хуыздæр чи бацæттæ кодта, уыцы фæсивæды.
