Æнахъомты къухты смартфон уайдзæфы аккаг нал у, ныр йæ фæрцы ахуыр кæнынц мадæлон æвзаг. “Цæрæгойы сæмбырд кæн” – хуымæтæг хъазт нæу, фæлæ бæстон, цымыдисаг проект. Йæ райрæзтыл бакуыст æнцон нæ уыд. Цæмæй иттæг хорз рауайа, уый тыххæй Дзиуаты Марат æппынæдзух уынаффæ кодта ахуыргæнæгимæ.
Проекты нысан, цæмæй сывæллæттæ мадæлон æвзаг ахуыр кæной æрмæст чингуытæй нæ, фæлæ къæпхæнты сæрты хизгæйæ. Æрыгон нæлгоймаг зæгъы: “Афтæ бирæ цымыдисагдæр у”. Хъазт æмткæй арæзт у дыууæ хуызæй: фыццаджы хъæуы дзырд раст ратæлмац кæнын æмæ ныв баххæст кæнын, дыккаг та дикторы амынддзинадмæ байхъусын æмæ хъæугæ фигурæ равзарын.
Компьтерон программæтæ аразæджы курдиат æнæ æрхъуыдыйæ нæ баззад. Проект раззагдæр бынат бацахста æппæтадæмон форум “Шаг в будущее”-йы. IT къабазы æнтыстдзинæдты тыххæй та Марат хорзæхгонд æрцыд республикæйы сæргълæууæджы премийæ. Ныртæккæ æнахъомæн ахсджиаг рæстæг у. Разæй йæм æнхъæлмæ кæсынц иумæйаг паддзахадон фæлварæнтæ æмæ уæлдæр ахуыргæндонмæ фæндаг.
Мараты æнтыстдзинæдтæ къухы бафтыдысты йæ ахуыргæнæг Мария Макаренкойы фæрцы. Уый æрмæст теори нæ дæтты, фæлæ разæнгард кæны кæстæрты. Цы хъуыддаджы лæуд у, уый уарзы æмæ, æнæмæг, кæстæртыл дæр зыны. Сæйрагдæрыл та нымайы – иттæг хорз куыст.
Мария амоны цалдæр дисциплинæйы. Уыдонæн сæ цымыдисагдæр – робототехникæ. Фæсивæд ахуыр кæнынц механизм базоныныл æмæ иумæйагæй ерысты баххæст кæнынц сæ хæслæвæрдтæ. Хъазты макет та педагог сарæзта йæхи къухтæй.
Квесты хъуыды тынг цымыдисаг у. Хæххон бынаты æрцыд æвирхъау цау. Æмæ роботтæ ирвæзын кæнынц адæмы. Алы лыстæгдзинадыл дæр бæстон бакуыстой.
Мараты æмæ йæ разамонæджы архайд ма иу хатт дæнцæгæн æрхæссæн ис, бæрзонд технологитæ бындур ныффидар кæнынæн хъæугæ кæй сты, уыимæ ма ивгъуыд бахъахъхъæнынæн дæр пайда.
