Камбилеевкæйы 1-æм скъола раздæры куысты фæткмæ рахызт. Цалдæр мæйы бындурон цалцæджы тыххæй бæстыхайы иу хай уыд æхгæд. Ныр куыстытæ кæронмæ фæхæццæ кæнынц. Сабитæ æмæ ахуыргæнджытæ бакъахдзæф кодтой райдзаст æмæ рæсугъд агъуыстытæм.
Цыппæрæмкъласонтæм сæхи кабинеты уроктæ фароны майæ нырмæ нæ уыд. Цыди дзы бындурон цалцæг. Ныр, агъуыстæй уæлдай, ахуыргæнæн ифтонггæрзтæ дæр иууылдæр сты ног — нырыккон æмæ æдас. Ахæм уавæрты зонындзинæдтæ исын æхсызгондæр у. Ноггонд æрцыд Камбилеевкæйы фыццæгæм скъолайы уæлæмхасæн бæстыхай. Скъола у Горæтгæрон районы асстæуккаг ахуырады уагдæтты стырдæр. Сывæллæтты цинæн кæрон дæр нæй.
Ахæм ивддзинæдтæ æхсызгон сты ахуыргæнджытæн дæр. Ныр талынг æмæ уазал агъуыстыты куыст фестейæ баззад. Уый бæсты — интерактивон фæйнæджытæ, проектортæ, компьютертæ. Робототехникæ æмæ «Рæзты тæлмы» кълæсты скъоладзаутæ æмхиц кæнынц IT-технологитæм. Аккаг уавæртæ — шахмæттæй хъазынæн. Цæмæй сывæллон ахуыр кæнынмæ сразæнгард уа, уый тыххæй æппæт дæр арæзт цæуы.
Рацарæзты рæстæг скъоладзаутæ ахуыр кодтой дыууæ фæлтæрæй. Æнцон нæ уыд, зæгъынц ахуыргæнджытæ, фæлæ ног уавæртæ уый аккаг уыдысты. Бындурон цалцæджы фæстæ цыма æндæр скъоламæ æрбакъахдзæф кодтой, афтæ. Хæрæндон дæр фæуæрæхдæр. Сæвæрдтой дзы уазалгæнæнтæ, пароконвектоматтæ, пецтæ, уæлдæф сыгъдæггæнæнтæ, раковинæтæ, – цыппор азы кæуыл рацыд, уыцы бæстыхайы раздæры ифтонггæрзтæй ницыуал ныууагътой, алцыдæр ног.
Уæлæмхасæн бæстыхайы бындурон цалцæг къухы бафтыд «Скъолайы ахуырады системæтæ сног кæныны» федералон программæйы руаджы. Уæвгæ, скъолайы сæйраг бæстыхайыл та 70 азы цæуы, уымæн дæр йæ рацарæзты пълан муниципалитеты цæттæ кæнынц.
