Цæгат Ирыстон сси проект «Уæрæсейы кино»-йы архайæг. Ныр æй 5 азæй фылдæр æххæст кæнынц Стратегион хъæппæристы агентад Кино æмæ телеуынынады продюсерты æмбаладимæ иумæ, бæстæйы Культурæйы министрады æххуысæй. Бадзырд Мæскуыйы бафыстой регионы разамонæг Сергей Меняйло, Стратегион хъæппæристы агентады генералон директор Светлана Чупшева æмæ Кино æмæ телеуынынады продюсерты æмбалады правленийы сæрдар Сергей Сельянов.
Сергей Меняйло зæрдыл æрлæууын кодта, фарон Уæрæсейы Президенты указмæ гæсгæ, Цæгат Кавказы кинохроникæйы студийы акциты 100% республикæйы исбонадмæ лæвæрд кæй æрцыдысты. Цæгат Ирыстон у 20-æм регион, проект «Уæрæсейы кино»-йы чи архайы. Ныр республикæйы æрæмбырд кæндзысты сæрмагонд къамис. Æххуыс кæндзæн теле- æмæ кинокомпанитæн бынæттæ æмæ кусджыты агурынмӕ, кæнæ бардæттæг гæххæттытæ исынмӕ. Уæдæ кинонывтæ чи иса, уыдомæ æхцайæ дæр фæкæсдзысты. Уымæй уæлдай, арæзт цæудзысты ахуырадон проекттæ, программæтæ, дæсныйадæвдисæн ахуыртæ.
