Йæ музыкæ фыццаг зæлтæй дæр ахъары зæрдæйы. Фортепианойыл цæгъдынмӕ йæ сæрæндзинад ныр бирæ азты дæргъы дисы æфтауы. Абон классикон музыкæйы дæсны, маэстро, аивады сгуыхт архайæг Махъоты Ацæмæзæн у йæ юбилей. Композиторы цардвæндагыл афӕлгӕсыд не сфæлдыстадон къорд.
Музыкæйыл нæдæр рæстæг тых кæны, нæдæр тыгъдад. Ацы арф хъуыдыйæн æвдисæн – Макоты Ацæмæзы музыкалон уацмыс “Ручеек”. Уый а дунейыл кæм нæ азæлыд, ахæм бынат зын ссарæн у. Ныр дæр та хъуысы Европæйы музыкалон горæт Венæйы. Сыгъдæг Иоанн Капистраны аргъуаны йæ зары Ацæмæзы ахуыргæнинаг-маэстро Нелли Гончарук.
Музыкант кæддæриддæр сæрбæрзондæй фæзæгъы “мæ ахуыргæнæг Макоты Ацæмæз”, зæгъгæ. Нæллийы ныхæстæм гæсгæ йæ дӕсны хистæр канд музыкалон курдиатæй æххæст нæу, у хъæздыг удыхъæды хицау, хæлар ӕмӕ фæлмæнзæрдæ, вӕййы кæддæриддæр æххуысы къух бадарынмæ цæттæ. Афтæмæй йæ бахъуыды кодта Нæлли. Ӕмæ ма йæ ныхасмæ бафтауы, аивады æрфытæ Макойы-фыртимæ басгарыны гæнæн ын кæй фæзынд, уый у Хуыцауы лæвар, зӕгъгӕ.
Симфони, мюзикл, балет, инструменталон концерт. Уæвгæ, Макоты Ацæмæзы аивадон къæбицы дæсгай уацмыстæ ис. Æппæт дунейы аивадæн уæлдай кад чи кæны, уыдонæн æнæзонгæ не сты.Уæдæ Цæгат Ирыстоны гимны музыкæйыл дӕр Макоты Ацæмæз бакуыста. Уымæй уæлдай ма ссис бирæ вокалон, камерон æмæ æмзаргæ уацмысты автор. Æгæрон курдиаты хицау, Макоты Ацæмæз йе`вæрæн бахаста кинонывты æмæ 50 спектаклæй фылдæры музыкалон фæлгонцтӕм дæр.
Музыкант роялыл цæгъдынмæ кæй сцымыдис кæны, уыдон иу æмæ дыууæ не сты. Ацы музыкалон инструментыл цæгъдынæй йӕ ничи амбулдзæн. Æвæццæгæн, йæ алы уымысы дæр Ирыстонмæ уарзондзинад æххæстæй кæй раргом кæны æмæ патриотизмы суадонæй алчидæр кæй фæхъæстæ вæййы, уый тыххӕй. Музыкæйæ ссары аивадуарзджыты зæрдæтæм фæндаг.
Музыкæмæ тырнынад хуымæтæг нæу. Йӕ фæрцы адæймагмӕ фӕзыны аивадон тых, йæ уд бафтыд уӕлмонцты уацары. Йе сфæлдыстадон фæндаг Макоты Ацæмæз райдыдта Дзæуджыхъæуы Чайковскийы номыл музыкалон скъолайы. Хорз бæрæггæнæнтимæ йæ фæцис. Бацыд Дзæуджыхъæуы аивӕдты училищемæ. Дарддæр Ленинаграды консерваторийы ахуыр кодта фортепианойы хайады. Абон Макоты Ацæмæз, рæзгæ фæлтæрæй йæхи музыкæйы чи фæлвары, уыдонæн у дæнцæгæн хæссинаг.
Республикæйы композиторты Цæдисы разамынды сæрдар, Уæрæсейы композиторты Цæдисы секретарь, Цæгат Ирыстоны паддзахадон филармонийы аивадон разамонг æмæ директор, Уæрæсейы аивæдты сгуыхт архайæг. Йæ бирæ хорзæхтæ нымад чи фæуыдзæн. Фæлæ сæйраг уый у, æмæ, раздæрау, кæй у хæдæфсарм æмæ йæ куыстыл кæй у æнувыд, уый.
Макоты Ацæмæз у, æмбал кæмæн нæй, ахæм курдиаты хицау. Йæ музыкæ та æрмæст йæ фыццаг зæлтæй дæр ахъары зæрдæйы. Макоты Ацæмæз абон бæрæг кæны йӕ гуырæн бон. Æххæст ыл кæны 65 азы.
