Ацы наукæ хуымæтæджы уырыссагау «Царица наук», зæгъгæ нæ фæхонынц. Се ‘ппæтæн æй æнцон ахуыр кæнын нæ вæййы. Фæлæ хъæугæ та царды цы нæ къабазы кæны, иу ахæм дæр нæй. Математикон клуб «Панда»-йы хъомылгæнинæгтæ уый хорз зонынц. Сæ ахуыргæнджытæ сын æххуыс кæнынц логикон хуызы хъуыдыкæнынадыл сахуыр кæнынæн. Клубы ахуырдзаутæ та æртæ азмæ равдыстой хорз хатдзæгтæ. Сæ фидæн дæр бæттынц ацы предметимæ.
Уаты сабыр кæй у, уый дисы никæй æфтауы. Æнæ уымæй математикон хæслæвæрдтæ кæнæн нæй. Æнцон дæр кæм вæййынц. Уыимæ ма ахуырдзауты фæхъæуы æнæмæнг бамбарын кæнын, куыд скодтой хæслæвæрд, уый. Математикон клуб «Панда»-йы куыд зæгъынц, афтæмæй сывæллæттæ æрмæст формулæтæ хъуамæ ма зоной, фæлæ ма хъуыды кæнын дæр зоной.
«Уæлдай цæстæнгас здахæм методтæм. Сывæллæтты ахуыр кæнæм хъуыды кæныныл. Методтæ уал ахуыр кæнæм, уый фæстæ хæслæвæрдтæ кæнгæйæ бафидар кæнæм нæ зонындзинæдтæ. афтæмæй сывæллæттæ ахуыр кæнынц хъуыды кæнын дæр. Уымæн æмæ математикæ фыццаджы дæр ууыл ахуыр кæны», – математикæйы ахуыргæнæг Чшиаты Аслан.
Математикон клуб кусы ныридæгæн æртыккаг аз. Чшиаты Аслан йæ бинойнагимæ сарæзтой сæхи методикæ. Уымæ гæсгæ сывæллæтты ахуыр кæнынц æмæ сæ цæттæ кæнынц олимпиадæтæм.
«Махæн æппæты вазыгджындæр у скъоламæ цы математикон ахуырад хауы, уый нæ республикæйы рæзын кæнын. Уымæн æмæ математикæ бирæ фæндæгтæ гом кæны сывæллæттæн, стæй регионæн дæр», – Аслан Чшиев.
Клубы хъомылгæнинæгтæ математикæ æрмæст сæ уарзондæр предмет нæу, фæлæ ма у сæ царды нысан дæр. Бирæтæ сæ фидæны дæсныйад нæма равзæрстой, фæлæ ныридæгæг зонынц математикæимæ баст кæй уыдзæн, уый.
«Математикæ мæнмæ гæсгæ хъæуы се ппæты дæр. уый æххуыс кæны нымайын æмæ хъуыды кæнынæн. Нырма нæма зонын, кæмæй кусдзынæн фидæны. Фæлæ математикæимæ баст уыдзæн мæ дæсныйад æнæмæнг», – математикон клуб «Панда»-йы хъомылгæнинæг Хуыгаты Валерия.
«Математикæ у цымыдисаг наукæ. Æнцон æй мын уайы йæ ахуыр кæнын. Уæдæ мын фидæны дæр пайда уыдзæн», – математикон клуб «Панда»-йы хъомылгæнинæг Амурхан Магаев
Ныртæккæ клубы ахуыр кæны 50 адæймагмæ хæстæг 3-æгæмæй 11-æм кълæсты. Ахуыртæ фæцæуынц къуыри 2 хатты фæйнæ 2 æмæ рдæг сахаты. Математикон клубы ахуыр кæнын у лæвар. Скъолаты сабитæн цы нæ бантысы, уый ам сæххæст кæнынц.
Биджелты Бертæ
