Бирæ туг фæкалд уыцы хæсты æмæ уæлахизы бонмæ бирæтæ нал фæцардысты. Æмæ кæд 9-æм майы бон иууылдæр зонынц, уæд ацы историон цау алчи, хъыгагæн, йæ зæрдыл нæ дары. Сæ рухс нæмттæ рох хъуамæ ма уой. Æнæзæгъгæ æфхæрд чи баййæфта, йæхи цæстæй блокадæ чи федта, уыдоны бабæрæг кодта не сфæлдыстадон къорд.
Ацы гæххæттæ `вæрд сты 1941 азæй нырмæ, зæгъы Галина Семенюк. Уыцы `ххормаг рæстæг, йæ тарф фынæйы дæр нæ ферох кæндзæн. Цыди йыл æрмæстдæр 3 азы, фашисттæ Ленинград куы бацахстой, уæд. 900 тыхст боны арвыста Галинæ йæ хистæр хо æмæ мадимæ. Сæ цард æндахыл ауыгъд уыдис рæмудзæн æрмæджыты бын. 27 январь та кæддæриддæр нымайдзæн йæ райгуырды дыккаг боныл.
«Бæрæг кæнын æрмæстдæр 9 май æмæ 27 январь. Ног аз, кæнæ та мæ гуырæн бон нæ фæбæрæг кæнын, ацы дыууæ боны та никуы ферох кæндзынæн», — загъы блокадæйы уæвæг Галина Семенюк.
Сæрибары бон Галинæ сбæрæг кæны йæ хорз мбалимæ. Уый дæр, амынæты чи фæцис, ахæм – Галина Полтарацкая. Се стъолыл алы хатт – сау дзул. Дыууæйæн дæр нал баззад нæдæр ныййырджытæ, нæдæр бинонтæ, нæдæр цот. Сæ ивгъуыды алы бон дæр — æвзæр фынау. Хиуæтты мæлæт, бомбæты гыбар-гыбур, æххормаг рæстæджытæ, дæрæн хæдзæрттæ æмæ… æнæкæрон рад дзулмæ. Алы бон дæр — тасæмхæццæ.
«Цыдис мыл 3 азы. Кæй зæгъын æй хъæуы æмæ ницы хъуыды кæнын. Мæ мад иу госпитальмæ цыд. Хъæццулæй-иу мæ æрæмбæрзтта æмæ иу ацыд. Зонгæ дæр æй нæ кодта, куы `рцæуа, уæд ма `гас уыдзынæн æви нæ, уый. Æз та-иу хъæццулы бын дзулы хус къæбæртæ æууылдтон», — блокадæйы уæвæг Галина Полторацкая загъта.
Блокадæйы байгомимæ, Советон Æфсад райдыдта йæ уæлахизмæ фæндаг. Æмæ кæд 9 майы боны тыххæй иууылдæр зонынц, уæд Ленинграды цагъды бон дзæвгар адæмæй ферох. Уый фæбæрæг кодтой Æппæт уæрæсеон адæмон фронты раззагдæр архайджытæ, «Блокада Ленинграда в цифрах. Задумайся”, зæгъгæ, акци саразгæйæ. Базарадон центрты стъолтыл æвæрд æрцыдысты дзулы кæрдихтæ, Ленинграды блокадæйы рæстæг цæйас уыдысты, раст ахæмтæ.
Цалдæр мин адæймагæй нырмæ æгасæй баззадысты 11. Рацыд 74 азы. Алчидæр сæ дзулмæ кæсы цавæрдæр æнахуыр цæстæй — хуымæтæджы хойраг нæ, фæлæ цард кæй руаджы нæ бамынæг, ахæм. Блокадæйы 1 мæйы фæстæ дзулы бæрц фæкъаддæр 600 граммæй 125 граммæ. Дзулæй уæлдай ма — æрмæстдæр дон. 872 бонмæ амард 1 милуанæй фылдæр адæм. Ацы акци — сæ ном арынæн. Сарæзтой йæ фыццаг хатт. 2 мин адæймагæй дзы фылдæрæй бацархайдтой. Историон азфысты халæн аскъуыйæн нæй…
Пелиты Сабинæ
