Цæгат Ирыстоны сбæрæг кодтой ленк кæнынæй чемпионат æмæ фыццаг бынат бацахсыныл ерысты уæлахиздзауты. Командон хыгъды фыццаг бынат райста спортивон скъола “Урожай”. Æвзист майдан — Цæгат Кавказы хæххон-металлургон институтмæ, хуыздæрты хыгъд сæхгæдта Мæздæджы район. 150 спортсмены сæ арæхстдзинад æвдыстой дыууæ боны дæргъы. Ленк кодтой алыхуызон дисциплинæты: кроль, баттерфляй, брасс, уæгъдибар стиль æмæ эстафетæ. Хуыздæрты бахæсдзысты республикæйы иугонд командæмæ, архайдзысты Цæгат Кавказы федералон зылды æмвæзадыл 18-æмæй 22-æм мартъийы онг Волгограды.
Чемпионат ацыд Беслæны спортивон-дзæбæхгæнæн комплексы. Йæ байгом кæныны кадджын мадзал бабæрæг кодта физкультурæ æмæ спорты министр. Хуадонты Артур фæнысан кодта ахæм ерысты ахадындзинад нацийы æнæниз цардыуагыл. Хуыздæрты сбæрæг кодтой алы кары категорийы дæр. Ленк кæныны федерацийы президент Гæджиты Татьянæйы ныхасмæ гæсгæ, алы баленк дæр уыд хъæддых ныхмæлæуд.
