Фыдыбæстæйы Стыр хæсты рæстæджы егъаудæр операцитæй иу у «Багратион». Уæд, 44-æм азы августы суæгъд кодтой нырыккон Белорусси, Литва æмæ Польшæйы хай. Карз тохтæ цыд Прибалтикæйы 1-æм æмæ Белоруссийы 1-æм, 2-æм æмæ 3-æм фронтты. Басастой немыцаг æфсад «Центр», скуынæг кодтой Вермахты 30 дивизийы. Уыцы операцийы, официалон бæрæггæнæнтæм гæсгæ, фæмард 180 мин адæймаджы, 590 мины бæрц та – фæцæфтæ сты.
Уырыссаг, украинаг, дзуттаг, тæтæйраг, сомихаг æмæ ирон – фæрсæй-фæрстæм æрлæугæйæ фашисттæй суæгъд кодтой Минск, Витебск, Могилёв, Орша, Вильнюс, Каунас. Не ‘мзæххон хистæр лейтенант Хъæстуаты Мæхæмæт ныгæд ис АнтАкальнисы уæлмæрдты Вильнюсы. Æрæджы уым Советон æфсæддонты номыл цыртдзæвæнтæ ныппырх кодтой, фæлæ, йæ цард сæрибардзинады сæраппонд чи радта, уыдон не ‘мбæстонтæй абон дæр рох не сты.
