Райдианы уыди дзырд: ахæм сæргондимæ брифинг ацыд Адæмты хæлардзинады республикон хæдзары. Сарæзтой йæ Национ политикæ æмæ æддагон бастдзинæдты министрадимæ иумæ. Фæсивæд фембæлдысты Цæгат Кавказы фысджытимæ. Мадзал баст у мадæлон æвзаджы æппæтдунеон бонимæ.
Фехъусæн уыд бирæ адæмыхæттыты ныхас адæмон фольклор, зарджытæ æмæ æмдзæвгæты уылты: ирон, уырыссаг, азербаджайнаг, грекъаг, сомихаг, гуырдзиаг, дагестайнаг, немыцаг, тæтæйраг æмæ бирæ æндæр æвзæгтæ. Сæ поэтикон сфæлдыстадимæ базонгæ уæвын уыд онлайн хуызы дæр. Классиктæ мадæлон æвзаджы тыххæй цы чингуытæ ныффыстой, уыдонæй уазджытæн сарæзтой сæрмагонд равдыст. Брифинг амыдта Хæлардзинады хæдзары разамонæджы хæдивæг Хъайтыхъты Тамарæ.
Цæгат Ирыстоны ис 34 национ-культурон æхсæнады. Æдæппæтæй та регионы цæры 107 адæмыхатты минæвæрттæ. Дунейы цы 6 мин æвзагæй фылдæр ис, уыдонæй 40% сæфты къахыл ныллæууыдысты. Æвзагимæ иумæ та рохуаты зайы нацийы культурон хъæздыгдзинад.
