Уæндон старт алкæддæр свæййы спринтеры æппæты ахсджиагдæр къахдзæф. Тыхстдзинад æмæ тыхджын æнкъарæнтæ арæх расайынц æвзæр фæстиуджытæм. Бахъуаджы минут атлет хъуамæ йæ тыхтæ æмæ хъуыдытæ сараза æрмæст йæ архайдмæ.
Къуылымпыдзиндтимæ хæслæвæрдтæ баххæст кæнынæн ахсджиаг у бæлвырддзинад æмæ техникæ. Иу æвзæр змæлд расайдзæн травмæмæ. Нæ хъайтар — æвзонг спортсмен. Ростислав йæ кармæ гæсгæ у размæдзыд. Æппæты фылдæр рæстæг æй бахъæуы разминкæйæн. Спортсмены ныхасмæ гæсгæ рог атлетикæ у йæ цард.
Ростиславы фидæн сабийæ бæрæг уыд. Лæппуйы бинонты фæлтæртæ сты профессионалон атлеттæ. Йæ дисциплинæ бирæтæн у дæнцæгæн хæссинаг. Сæйраг тренирæвкæтæй уæлдай лæппу æппынæдзух стадионы æмæ паркты йæхиуыл кусы, алы дæрддзæгыл згъоры.
Ростиславæн ацы ерыстæ уæлдай ахсджиаг сты. Турниры сæйраг приз – Вячеслав Лядновы кубок – йæ бабайы, уый йæ цардæй ахицæн ивгъуыд аз. Спорсмены раззагдæр суæвын хъæуы 60 метры дистанцæйыл. Атлет тырны æрмæст уæлахизмæ.
Рог атлетикæ дисциплинæты парахаты тыххæй хонынц “спорты ус-паддзах”. Стартты программæйы згъорыны дистанцитæ 60, 400, 800, 1500 æмæ ма суанг 3 мин метрæн, фæсивæд дзы сбæрæг кæндзысты сæ арæхстдзинад æмæ тагъдад. Спортсментæ ма сæхи фæлварынц нæмыг æхсынæй æмæ гæпп кæнынæй.
Стартты архайынц æртæ сæдæ адæймагæй фылдæр. Бынаты Цæгат Кавказы алы къуымтæй спортсментæ. Аренæйыл фембæлдысты уазджытæ Дагестанæй, Стъараполы крайæ, Кæсæг-Балхъарæй æмæ Мæхъæлæй. Фæсивæд иу ран нæ лæууыдысты. Спортивон фæзтæй иу дæр уæгъд нæ уыд. Атлеттæ тæвд кæнынц сæ æрхæджытæ, згъорынц, цæст дарынц сæ ныхмæлæуджытæм. Спортивон скъолайы директор Владимир Куликов фæнысан кодта, ацы турниры сæйраг нысантæй иу – кæстæрты зæрдыл æрлæууын кæнын хъуыстгонд тренерты нæмттæ.
Фæсивæдæн ерыстæ æрмæст хорзæхтæм тырнындзинад нæу. Уый сын у раздæры дæсныты фæлтæрддзинадæй пайда кæныны гæнæн. Цалынмæ архайджытæ ног рекордтæ æвæрынц, уæд мæ хъуыстгонд атлетты бындуртæ фидарддæр кæнынц.
