Национ музейы – хæцæнгарзы равдыст

Национ музейы байгом, æмбал кæмæн нæй, ахæм экспонатты равдыст. Арæзт у 3 хайæ. Фыццаг залы фенæн ис, Дзæуджыхъæуы Мариинаг театры æрмадзы артисттæн цы хъæздыг æмæ цымыдисаг костюмтæ бахуыдтой, уыдон. Æрбацæуджыты хъуыдымæ гæсгæ, аив æмæ рæсугъд сты. Уый та ууыл дзурæг у, æмæ нæ республикæйы дæсны хуыйджытæ кæй ис. Дыккаг залы та равæрдтой ирон адæмон сфæлдыстады æвдисæнтæ. Се `хсæн – зындгонд нывгæнджытæ Нарты кадджытæм цы иллюстрацитæ скодтой, уыдон. Ис ма дзы, арæх кæй нæ фендзынæ, ахæм чингуытæ. Æртыккаг залы та ис кавказаг æмæ ирайнаг хæцæнгæрзтæ. Зæгъæм, Плиты Иссæйы зындгонд маузер, Хетæгкаты Къостайы цирхъ æмæ иннæ зындгонд адæмы хæцæнгарз. Истори чи уарзы, рагон æвдисæнтæ цымыдисаг кæмæ кæсынц, уыдон дзы бирæ ног экспонаттæ æмæ æрмæджытæ фендзысты.