Республикон клиникон рынчындоны арæн хайады архайд ныр ног кусæнгæрзты руаджы фæхъомысджындæр уыдзæн. Ацы медицинон кусæнгарз – Тианокс, зæгъгæ, æххуыс у йæ рæуджытæ хъыгдард кæмæн сты, ахæм сабитæн. ИВЛ-ы аппаратимæ иумæ пациентты дадзинты уылты бауадзынц хъæугæ туаггуыр æмæ азот.
Медицинон кусæнгарз у нæхи бæстæйы уагъд. Æппæт дунейы йын æмбал нæй, зæгъынц специалисттæ. Æндæр ахæм аппарттимæ абаргæйæ у æдас æмæ бахъуаджы рæстæг свæййы сæйраг фæрæз, сывæллоны аирвæзын кæныны архайды.
Ам та ис ног инкубатортæ. Уæрæсейаг аппаратты руаджы кæсынц чысыл пациентты уæзмæ, уæдæ сæ ис хъæугæ бæрзæнд равзарæн дæр. Ацы чысыл рудзгуыты руаджы та ис ноггуырдтæн цыфæнды зын операцитæ скæнæн дæр. Уæвгæ, арæн хайады инкубатортæ фаг нæ уыд.
Æдæппæтæй ам райстой медицинон ног техникæйы 270 иуæджы. “Бинонтæ” национ проекты фæлгæты арæн хайад æппæт дæр сног кæндзысты. Рынчындонæн уый у ахадгæ æххуыс. Нырыккон медицинон кусæнгæрзтæ ам исынц фæззæгæй нырмæ. Фæстаг парти та райстой афæдзы кæрон.
Ныртæккæ уал ног аппараттæ сты фæлварæн архайды. Кусджытæн та инструктаж кæнынц Уæрæсейы раззагдæр специалисттæ. Хæстæг рæстæг та аппараттæ раивдзысты практикон архайдмæ. Уыцы хъуыддаг та хорзы рдæм саахаддзæн ноггуырд пациентты реабилитацийыл.
