Сывæллæтты 1-æм поликлиникæ ныридæгæн равдæлон кодтой. Фараст мæймæ бæстыхайы сæр æмæ хъармдæттæн хæтæлтæ раивдзысты, сæвæрдзысты дзы ног лифт. Агъуыстыты фæлгонц уыдзæн нырыккон, æддаг бакастмæ æмæ алфамбылай территоримæ базилдзысты. Бæлæстæ дæр бахсæддзысты æмæ сæ ног тауты æвзонг къалиутæ фæаивдæр кæндзысты.
Ноябры онг цæрджытæ тыхстдзинæдтæ бавзардзысты, фæлæ рæстæгмæ бынæтты, Южный æмæ Карцайы медицинон кусæндæтты, æппæт фадæттæ дæр ис. Æхсыры къæбиц уал Ортопедон центрмæ ахастой Пушкины уынгмæ. Сывæллæтты 3-æм поликлиникæ та ныридæгæн цæттæ кæнынц байгом кæнынмæ. Ам баиу кодтой зынгсирвæзтæй хъахъхъæнæг сигнализаци æмæ вентиляцион системæтæ. Æрмæст ма аивгæнæн куыстытæ кæронмæ хæццæ кæнынц. Медицинон кусæндон куы байгом 82-æм азы, уæдæй бындурон цалцæг никуы бавзæрста. Йæ дохтыртæ сменæмæ балæггад кæнынц 500 адæймагæн. Уыдон уал рæстæгмæ æххуыс исынц Хæххон-металлургон институты территорийыл. Куыстытæ ахæсдзысты мартъийы онг.
Медицинон кусæндæтты цалцæг æххсæтгонд цæуы “Æнæниздзинадхъахъхъæнынады системæйы райдиан къæпхæн нывылкæнынады” федералон программæйы “Дæргъвæтин æмæ активон царды” национ проекты æххуысæй. Дарддæр, февралы, ног кæнын райдайдзысты сывæллæтты 2-æм поликлиникæ.
