Бирæуæладзыгон хæдзæртты лифтытæ афтæ арæх фехæлынц æмæ йыл цæрджытæ дис дæр нал кæнынц. Сæ хъаст разамынд дæттæг компанитæм бахæссынц. Фæлæ фылдæр хатт хъуыддаг хуыздæрырдæм н` аивы. Уæд сæ куыст райдайынц паддзахадон цæрæнуæтты инспекцийы æмæ Уæрæсейы техникон цæстдарды хайады специалисттæ. Уыдон хъуамæ лифтты уавæр сбæрæг кæной æмæ разамынд дæттæг компанийæн бахæс кæной йæ саразын. Æмæ æхсызгон хабар, ацы хъуыддагæй чи сфæлмæцыд, уыдонæн. Тагъд зæронд лифтытæ ногтæй раивыны амал дæр фæзындзæн.
Доваторы уынджы бирæуæладзыгон хæдзæртты цæрджытæн сæ фатертæм фæндаг хъизæмарæй уæлдай нæу. 9-æм уæладзыгмæ схизын фылдæр хатт æрыгæттæн дæр зын у. Уæд ма хистæр кары адæм та сæхи куыд æнкъарынц?! Бæрзонд уæладзыгмæ ссæугæйæ бирæтæн се`нæниздзинад фæфыддæр вæййы. Цæрджытæ куыд зæгъынц, афтæмæй, сæ лифтытæ арæх нæ фæкусынц.
Бирæуæладзыгон хæдзæрттæн сæ фылдæр ивгъуыд æнусы 80-æм азты сарæзтой. Уый та ууыл дзурæг у æмæ лифтытæн сæ эксплуатацийы рæстæг раджы фæцис. Хъæуы сæ баивын. Æмæ ныр цæрджытыл цины хабар æрцыд – лифтытæ ивын райдыдтой.
Ныртæккæ уал хæдзæртты лифтыты уавæр бæрæг кæнынц Кæсæг-Балхъары специалисттæ, кæнынц сын сæрмагонд экспертизæтæ. Цæгат Ирыстоны хъæугæ специалисттæ кæй нæй, уымæ гæсгæ æрбахуыдтой сыхаг республикæйы специалистты.
Лифтытæ цалцæггæнæн куыстыты фæтк ахæм хуызы сфидар кодтой: куыстыты 30% уыдзысты муниципалон бюджетæй, 70% та бындурон цалцæггæнæн куыстыты фонды фæрæзтæй. Уый та ууыл дзурæг у, æмæ лифтытæ ивын цæрджытæн сæхимæ кæсы. Уæдæ экспертизæ скæнынæн дæр цæрджытæ сæхæдæг хъуамæ бафидой. Иу бирæуæладзгон хæдзарæн экспертизæйы аргъ у 7 000 сомы. Æнæ экспертты хатдзæгтæй та сын сæ лифтытæ цалцæг ничи кæндзæн.
Нæ республикæ Уæрæсейы арæзтады министрадимæ бадзырд бафыста æмæ ныр ног лифттæ цыбыр рæстæгмæ райсæн ис. Сæ аргъ та сын 3 азмæ бафидыны бар ис. Уæвгæ, иу лифт баивынæн хъæуы 2 милуан сомы. Республикæй та ивинаг сты 140 лифты. Куыстыты хæрзхъæддзинадмæ цæст дардзæн нæ республикæйы паддзахадон цæрæнуæттæм цæстдарды управленийы специалисттæ.
Куыстытæ куыд тагъд райдайдзысты, уый бирæуæладзыгон хæдзæртты цæрджытæн сæхицæй аразгæ у. Экспертты хатдзæгтæ куыддæр райсой, афтæ хæдзары райдайдзысты ног лифт æвæрын. Специалисттæ фæнд кæнынц куыстытæ афæдзы кæронмæ фæуын. Фæлæ цалынмæ цæрджытæ экспертты хатдзæгтæм æнхъæлмæ кæсынц, уæдмæ уал иу уæладзгæй иннæмæ тезгъо кæнынц.
