Ногиры амбулаторийы дæндæгтæ дзæбæхгæнæн кабинеты арæзт æрцыд æппæт æмбæлгæ уавæртæ. Кусæнгæрзтæ сног кодтой афæдзы райдиан. Нырыккон стоматологон аппарат, бынативгæ видеограф, уый ‘руаджы куыст фенцондæр уыдзæн.
Хуыгаты Лолитæ Ногиры амбулаторийы стоматологæй ныридæгæн кусы 10 азы. Рæстæмбис нымадмæ гæсгæ бонмæ райсы 10 пациенты, се ‘хсæн куыд хистæртæ, афтæ сывæллæттæ дæр. Кусын райдыдта программæ “Земский доктор”-мæ гæсгæ. Фæлæ йæ æмгъуыды фæстæ дæр нæ ацыд дзæбæхгæнæндонæй.
Ногиры амбулатори бындуронæй сцалцæг кодтой программæ “Модернизация первичного звена”, зæгъгæ, программæмæ гæсгæ. Февралæй фæстæмæ медицинон кусæндон æххæстæй кусы. Стоматологы, гинекологы, терапевты, эндокринологы кабинеттæ, уыимæ ма процедурон æмæ прививкæ кæнынæн сæрмагонд бынæттæ. Иууылдæр сты æмбæлгæ кусæнгæрзтæй ифтонггонд.
Куыст фæткмæ гæсгæ цæуы лаборотарон хайады дæр. Бынаты раттæн ис иртæстыты æппæт хуызтæ. Бынативгæ флюрограф æмæ маммограф æрцæуынц мæй иу хатт. Хæстæгдæр рæстæг ма абулаторийы лæггад кæндзысты алы къабæзты специалисттæ. Амбулаторийы разамонæджы ныхæстæм гæсгæ, куысты бынæттæ сын ныридæгæн цæттæ сты.
Амбулатори сменæмæ лæггад кæны 100 адæймагæн. Медицинон кусджыты нымæц та дзы у 30. Ногиры цæры 12 мин адæймаджы æмæ дзы ацы дзæбæхгæнæндон иунæг у.
