Александра Шевцовайыл 11 азы цæуы. Чызг дзюдойы ныр ӕртӕ азы архайы. Тыхджындӕр кæй кӕны, уый йын æхсызгон у. Ахӕм кары сывӕллӕттӕн спорт хорз фæрæз у, бӕрнон суӕвынæн. Александрæйы уырны, дисциплинӕ, хъуамӕ алкæддæр лӕууа фыццаг бынаты. Ӕмӕ мæнæ ныр дæр фӕуӕлахиз йӕ ныхмӕлӕууӕгыл.
Нӕ спортсментӕ дæнцæг сты республикæйы æмæ суанг бӕстӕйы фӕсивӕдæн дӕр. Олимпаг призертӕ ӕмӕ чемпионтӕ сӕ уæлахизтæй сывæллæтты разæнгард кæнынц сӕ размӕ стыр нысантӕ ӕвӕрынӕн ӕмӕ размӕ цӕуынӕн. Октябрскæйы ерыстæ сæмбырд кодтой 160 дзюдоистӕй фылдӕр. Уыдонӕй алчидӕр фидӕны бӕллы дунеон татамимӕ рацӕуынмӕ. Уӕрӕсейы ӕмӕ Советон Цӕдисы сгуыхт тренер Гӕбӕраты Автандилы уырны, ахӕм мадзӕлттӕ кӕй хъӕуынц суинаг чемпионтæн.
Нӕ республикӕйы дзюдо парахат у. Сывӕллӕттӕ архайынц разæнгардæй, сӕ фарсмæ алкæддæр сæ тренертæ. Октябрскæйы сæргълæууæг Пухаты Вячеслав алы мадзӕлттӕй ӕххуыс кӕны ӕвзонг хъомылгӕнинӕгтӕн. Горӕтгӕрон районы спортивон скъола хъӕуы администрацимӕ фæсидт курдиатимæ, цӕмӕй архайджытæн самал кæной кубоктӕ ӕмӕ Кады гæххæттытæ. Ӕмӕ рӕсугъд хӕрзиуджытӕ, æнæмæнг, ссардзысты сӕ хицӕутты.
Дарддæр ерысты уӕлахиздзаутӕй ӕмӕ хуыздæр хъомылгӕнинӕгтӕй сæмбырд кæндзысты иугонд командæ. Фæсивæды æрвитдзысты республикон ӕмӕ ӕппӕтуӕрӕсеон ерыстӕм. Ныртӕккӕ та сӕ хъӕуы фӕлтӕрддзинад райсын ӕмӕ размæ тырнын. Татамийыл хи фидарæй равдисын, цыфӕнды бæрæггæнæнæй дæр ахсджиагдæр у. Уый хъуамæ алы спортсмен дæр фидарæй зона.
