Сæрмагонд операцийы архайджытæн æмæ сæ бинонтæн æххуысы фарстатыл æрдзырдтой къамисы рацæугæ æмбырды Дигорайы. Амыдта йæ вице-премьер Платы Альбинæ. Хицауады сæрдары хæдивæг фæбæрæг кодта, ацы здæхты тагъд æмæ æнæаипп архайд паддзахадон политикæйы фыццаградон хæс кæй у. Ветеранты арæхдæр фæхъæуы æххуыс ног професси райсын æмæ дæсныйад уæлдæргæнæн курсытæ ацæуыны. Уымæй уæлдай, документтæ æмæ ветераны æвдисæндар исгæйæ æмæ куыст агургæйæ. Сæрмагонд æфсæддон операцимæ Дыгуры районæй ацыдысты 300 адæймаджы. Уыдонæй 72 бахаудысты мобилизацимæ, 95 бафыстой контракттæ Хъахъхъæнынады министрадимæ республикæйы уылты. Иннæтæ сты сæрмагонд операцийы агъоммæ контрактбафысджытæ, кæнæ ацыдысты æндæр регионты уылты.
Ахсджиаг здæхтыты ‘хсæн — хæрзхъæд медицинон æххуыс æмæ се ‘нæниздзинад хъыгдард кæмæн у, уыцы ветеранты цавæр æххуыс хъæуы, уый раиртасын. Сæ хæдзæрттæ хъуамæ ифтонггонд уой сæрмагонд гæрзтæ æмæ мебелæй. Хæстонты бинонтимæ комкоммæ ныхас — сæ фарстатæ аиуварс кæныны сæйраг фæрæз. Вице-премьер фæсидт къамисы уæнгтæм, цæмæй формалон дзуаппытæ иуварсгонд æрцæуой.
