Цæгат Ирыстоны ацы азы кæронмæ фæзындзæн электрон хæдтулгæтæ электрон тыхæй 4 ифтонггæнæн станцæйы. Уый тыххæй рахай кодтой 11 милуан сомæй фылдæр.
Фидæны азы ма сараздзысты ноджыдæр 9. Уый тыххæй фехъусын кодтой хицауады æмбырды. Республикæ бахауд, электрон транспорт ифтонг кæнынæн фадæттæ кæм аразынц, уыцы регионты хыгъдмæ. Уый ‘руаджы хъуамæ регионы фылдæр ахæм хæдтулгæтæ фæзына. Æрныхас ма кодтой фæцæрынæн æппынкъаддæр æхцайы бæрцыл дæр. Уый хъуамæ сырæза 13 мины 729 соммæ. Кусынхъом адæмæн та хъуамæ суа 14 мины 965 сомы. Пенсионертæн – 11 мины 807 сомы. Сывæллæттæн та – 13 мины 331 сомы. Премьер Дзанайты Барис куыд фæбæрæг кодта, афтæмæй æппæт уыцы бæрæггæнæнтæм æнæмæнг кæсдзысты бюджетыл кусгæйæ.
Индексаци скæндзысты социалон фиддонтæн дæр. Фылдæр фиддонтæ райсдзысты 90 мин сывæллонæй фылдæр. Ацы фарстамæ хъуамæ æппынæдзух йæ цæст дара профилон уагдон. Æмбырды ма дзырдтой инфраструктурон бæстыхæйтты тыххæй дæр. Федералон бюджетæй ист сæрмагонд кредитты фæрæзтæй арæзт цæуынц цалдæр социалон-вазыгджын проекты.
Хицауады уæнгтæ ма æркастысты хъыгдард æнæниздзинадимæ адæмæн куыст ссарыны фарстамæ дæр. Ныхас цыд, куыстдæттджытæ ахæм адæмӕн куысты бынæттæ сифтонг кæныныл цы схардз кодтой, уыцы хæрдзтæ сын фæстæмæ бафидыныл. Организацитæ æмæ хицæн амалхъом адæймæгтæн субсидитæ дæттыны фæтк фидаргонд æрцыд. Дæтдзысты сын 72 мин сомы 1 куысты бынат сифтонг кæнынæн. Ныридæгæн ацы аз бацæттæ кæндзысты 30 кусæн бынаты хъыгдард æнæниздзинадимæ адæмæн.
