Республикæйы цæрджытæ хъуамæ медицинон æххуыс исой афойнадыл, æмæ ма уыимæ хъуамæ уа хæрзхъæд. Ацы хъуыддагæн ныр 9 азы дæргъы æххуыс у программæ “Земский доктор”. Чи дзы архайы, уыцы дохтыртæ райсынц иухаттон фиддон — милуан сомы, фелсыр та — 500 мин сомы. Нæ дарддæры æрмæджы хъайтар у Мзокты Ирбег, дохтыр анестезиолог-реаниматолог. Сфæнд кодта кусын Елхоты.
Ацы истори бинонтæ фæлтæрæй фæлтæрмæ дохтыртæ куыд свæййынц, уый тыххæй нæу. Мзокты Ирбег фыццаг æмæ нырма иунæг дохтыр у бинонты. Адæмы дзæбæх кæнын йæ царды нысан цæмæн сси, уымæн йæ аххосаг зæрдæагайгæ у. Гыццыл лæппу куы уыд, уæд бæллыд йæ мады низæй фервæзын кæнынмæ. Бацыд Цæгат Ирыстоны паддзахадон медицинон академимæ травмотологийы факультетмæ. Фæлæ иухатт студентæй реканимацион хайадмæ бацыд. Уым дохтыроты æвæстиат æмæ бæрнон архайд куы федта, уæд йæхицæн аскъуыддзаг кодта — суыдзæн дохтыр анестезиолог-реаниматолог.
Ирбег куыста медицинон æфсымæрæй Республикæйы клиникон рынчындоны реанимацийы хайады. Йæ дæсны æмкусджыты архайдмæ кæсгæйæ, фæлтæрддзинад иста 6-æм курсы кæроны онг. Фидарæй сфæнд кодта ацы здæхты ахуырад райсын дæр. Бацыд ординатурæмæ, райста йæ диплом. Абоны онг Ирбег иу æмæ дыууæ адæймаджы нæ фервæзын кодта мæлæтæй.
Мзокты Ирбег арæх хъуыста, районты дохтыртæ нæ фаг кæны, зæгъгæ. Программæ “Земский доктор”-ы тыххæй базыдта æнæнхъæлæджы æмæ дзы архайынвæнд скодта. Æнæниздзинад хъахъхъæнынады министрадимæ цы контракт бафыста, уымæ гæсгæ Елхоты бакусдзæн 5 азы. Уый тыххæй паддзахадæй райсдзæн милуан сомы. Æхцондзинад дын цы архайд хæссы, уымæн ма дын фидгæ дæр хорз куы кæной, уæд уæлдай æхсызгон у, – зæгъы æрыгон дохтыр.
Республикæйы æнæниздзинад хъахъхъæнынады министр Тебиаты Сосланы ныхасмæ гæсгæ, “Земский доктор”-ы руаджы дæрддзæф хъæуты цæрджытæн ис хæрзхъæд медицинон æхуыс исыны фадат. 2014 азæй 2023 азы онг, программæмæ гæсгæ, хъæутæм кусынмæ ацыдысты 150-ы бæрц специалисты.
Программæ алы аз дæр æнтыстджынæй сæххæст кæнæм. Йæ бæрæггæнæн у 100%-ы. Дохтыртæ алы хатт сæхæдæг не ‘рбацæуынц курдиатимæ. Арæхдæр фæхъæуы бафыдæбон кæнын хъæугæ спеиалисты ссарыны тыххæй. Уымæн æмæ дæрддзæф хъæумæ ацæуын алкæй нæ фæнды. Фæлæ мах хъæугæ дзырдтæ æмæ фæрæзтæ ссарæм. Афтæмæй уал нырма программæйы бæрæггæнæн у 100%-ы.
Программæмæ гæсгæ, фондз азы куысты дæргъы, мыздæй уæлдай, дохтыр райсдзæн иухаттон фиддон — 1 милуан сомы, фелсыр та — 500 мин сомы. Афтæ дохтыртæ æндæр рнæттæм кусынмæ нæ ацæуынц, фæлæ баззайынц республикæйы, зæгъынц дзуапдæттæг бæрнады. Сæйрагдæр у, цæмæй программæйы архайæгмæ адæмæн æххуыс кæныны фæндон уа.
