Радон æмбырд

Æртæ хорзы! Æртыгай фаззоны кæм райгуырд, ахæм 5 бинонтæн радтой хæдзар балхæнынæн сертификаттæ. Уыцы хъуыддагæн радих кодтой 8 милуан сомы – фехъусын кодтой абон хицауады радон æмбырды. Цæгат Ирыстоны фæллой æмæ социалон рæзты министр Хъесаты Игоры ныхæстæм гæсгæ ма ахæм æххуысмæ рады лæууынц 5 бинонтæ. Уыдонæн та æхзызгон лæвар скæндзысты æмæ сын сæ сертификаттæ ратдзысты ног азы. Хицауады уынаффæмæ гæсгæ ма æртæ сидзæр сывæллоны хъомыл кæнынмæ чи райса, уыцы бинонтæн бар уыдзæн ног фатермæ рады слæууынæн. Æмбырды ныхас кодтой Дыгургомы фæлладуадзæн комплекс «Порог неба»-йыл. Йæ райрæзтæн ын 3 милуан сомы бæрц радих кæндзæн паддзахад. Цæмæй сæм фылдæр туристтæ цæуа, уый тыххæй дзы лæггæдты хæрзхъæддзинадыл хъæуы бакусын, стæй сæ фæфылдæр кæнын. Паддзахад та цæттæ у амалхъом адæмæн, уæлдайдæр та туристон къабазы чи кусы, уыдонæн æххуыс кæнын. Æнæ цæстдард нæ баззайдзæн хъæууон хæдзарад дæр. Ног уынаффæмæ гæсгæ, хæхты фос чи дары æмæ хъæууон-хæдзарадон продукци чи уадзы, уыдоны зæххытæн хаццон фиддонтæ уыдзысты дыууæ хатты къаддæр. Хицауады æмбырды ма æрдзырдтой шахмæтты клубы фарстайыл. Паддзахадон исбоны æмæ зæххы ахастдзинæдты министр Тедеты Руслан куыд загъта, афтæмæй 2017-æм азы клуб паддзахады бæрны баззайдзæн. Иннæ аз та йæм базилдзысты, Кавказы адæмы культурæ æмæ спорты фестивалы цы преми рамбылдтой, уыцы фæрæзтæй.