Иу укол ӕмӕ цалдӕр миллилитры туг, гæнæн ис, æмæ искæй цард фервæзын кæной. Республикӕйы тугдæттыны центры ацыд донорон акци. Архайдтой дзы фӕлтӕрдджын донортӕ ӕмӕ, фыццаг хатт фæзминаг хъуыддагмæ йӕ ныфс чи бахаста, уыдон. Дохтыртæ зӕрдыл лӕууын кӕнынц — туджы компоненттæ кæддæриддæр нæ фæфаг кæны. Уымæй уæлдай ма донор суæвыны домæнты хыгъд дæр фæуӕрӕхдӕр кæндзысты.
Регистратурæйы адæмæй къух бакæнæн нæй. Ацы хатт æрбацæуджытæ уæлдай бирæ уыдысты. Колледжты студенттæ, алыхуызон организациты минæвæрттæ æмæ зæрдæхæлар цæрджытæ. Сæ къухты паспорт, сæ уды та æхсызгонæй баххуыс кæныны фæндон. Активисттæ æххæст кæнынц доноры анкетæ, уый фæстæ сæ бæстон фены дохтыр, скæны æркаст, туджы æлхъывдад сбары сæрмагонд профессионалон гарзæй.
Габолаты Зауырбеджы туг стæм цыппæрæм къордмæ хауы. Фыццаг хатт туг радта студент уæвгæйæ. Ныридæгæн донор у дæс азæй фылдæр. Ацы хатт дæр та йæхи бацæттæ кодта, æртæ боны бæстон каст хæрды фæткмæ, уый æнæмæнг у.
Акцийы архайджытæн æхсызгондзинад æрхæссыны тыххæй мадзаларазджытæ – æнæниздзинады райрæзты национ фонд æмæ Уæрæсейы медико-биологон федералон агентад бацæттæ кодтой чысыл музыкалон равдыст. Адæмты иудзинады афæдзы акцийы архайджытæ æрбацыдысты национ уæлæдарæсы.
Туджы донор суæвын алкæй бон дæр у, ахæм хуызы ис хъæугæ æххуыс бакæнæн. Уымæй уæлдай суæвæн ис стæджы магъзы донор дæр. Ацы хатт дыууæ акцийы баиу кодтам иу мадзалы.
Процедурæ ахæссы 10 минуты. Бæлвырд бæрц – 450 миллиграммы. 4-æм къорд – æппæты стæм, æппæты парахатдæр – дыккаг
æвæрццæг, зæгъынц дохтыртæ. Стæджы магъз раттынæн туг бахъæудзæн æрмæст 5 миллилитры, фæлæ рæстæг та дзæвгар фылдæр.
Процедурæйæн бахъæуы цыппарæй æхсæз сахаты онг. Аппаратон у æмæ уый тыххæй бахъæуы бирæ рæстæг. Доноры сæрмагондæй бацæттæ кæнынц. Процедурæйæ дыууæ боны раздæр ын скæнынц хъæугæ препараттæ. Уыдоны фæрцы стæджы магъзы чырæгтæ фæпарахатдæр вæййынц.
Дарддæр туджы дзæкъултæ фæдарынц сæрмагонд бынаты. Ныддих сæ кæнынц цыппар уазалгæнæныл туджы къордтæм гæсгæ. Уый фæстæ сæ курдиæттæм гæсгæ арвитынц медицинон кусæндæттæм. Кар 18 азæй, уæз 50 килограммæй къаддæр нæ. Фæлæ донор суæвынæн æппæты сæйрагдæр домæн – æнæниз уæвын. Процедурæ ацæуæн нæй æппындзух низджынтæн.
Ахсæны æмæ тъæнгты низтæ, гепатиттæ, вирусон низтæ, уымæй уæлдай ма донор суæвæн нæй оргæнтæ айсыны фæдыл операциты фæстæ, уыимæ сæры магъзы сæнкъуыстады фæстæ.
Донортæм домæнтæ, гæнæн ис, æмæ апарахат кæной, уыимæ ма фæуæрæх кæндзысты рæстæгмæйы æмæ æппыæдзухы фæдзæхстытæ. Донорты уынаффæйы проект ныммыхуыр кодта Уæрæсейы æнæниздзинадхъахъхъæнынады министрад. Стоматологон процедурæты, цæстытыл операциты, фадынæджы ныхмæ вакцинациты фæстæ 30 боны туг дæттæн нæй. Стæджы магъз сисыны фæстæ – 180 боны. Эпилепси чи рахаста, уыдонæн низы цыренæй хъуамæ рацæуа æппынкъаддæр æртæ азы. Ахæм низтæ куыд атеросклероз, егъау дадзинты аневризмæ, нервыты системæйы æмæ æвзæр низы фæстæ та донор суæвæн уæвгæ нæй. Ныртæккæ документ цæуы æхсæнадон æркаст. Нысангонд куы æрцæуа, уæд ног домæнтæ сæ тыхы бацæудзысты 2027-æм азæй.
