Цӕрӕгой рис нæ банкъары. Ветеринар скæны вакцинæ — процедурæ у тагъд, ахадгæ æмæ алы хæдзарадæн дæр æнæмæнг æххæст кæнгæ. Специалисттӕ прививкӕ снысан кæнынц стуртӕ ӕмӕ лыстӕг фосæн, скæнынц диагностикӕ ӕмӕ туг исынц лабораторон иртæстытæн.
Специалистты ныхæстæм гæсгæ, фосы хицæуттæ сæ куыстæй разыйæ баззайынц. Адӕм ӕмбарынц: афоныл профилактикӕ ӕххуыс у мыггаг бахъахъхъӕнынӕн ӕмӕ низтӕ парахат кӕнын ма бауадзынӕн.
Вакцинаци кӕнынц республикӕйы ӕппӕт районты дӕр. Ветеринарон службӕ архайы ӕрвылазон пъланмӕ гӕсгӕ. Ӕрмӕст ивгъуыд къуырийы рæуджыты низы фæдыл сбæрæг кодтой 2 мин 500 стурæй фылдæр. Уыимæ ма фондз мин иртæстæй фылдӕр скодтой бруцеллезæй, авдсӕдӕйæ фылдӕр та – лейкозæй. Парахатæй цæуы вакцинаци дӕр. Фаднизæй прививкæ скодтой 11 мин стурæй фылдæрæн æмæ лыстæг фосæн, сыбираг хъӕдгомӕй – дыууӕ мины онг. Ӕххӕстгонд цӕуы дерматит, агъуыдад ӕмӕ мӕргъты бӕрзонд патогенон гриппы профилактикӕ.
Фӕлӕ профилактикӕ æрмæст прививкӕтӕ ӕмӕ анализтӕ не сты. Ветеринартæн ахсджиаг у хӕдзарӕдты цӕрӕгойты бӕлвырд нымӕц зонын. Уымӕ гӕсгӕ сӕ дарддæр нысан кæнынц хыгъды. Алкӕмӕн дӕр лӕвӕрд цӕуы бӕлвырдгӕнӕн номыр, информаци та хаст цӕуы федералон системӕ “Хорриот” – мӕ. Специалисттӕ курынц хицӕуттӕй, цӕмӕй идентификаци æнæмæнг ацæуой.
Цӕрӕгой ӕвиппайды куы фӕрынчын уа, кӕнӕ куы фесæфа, уӕд специалисттӕ курынц, цӕмӕй сæ хицæуттæ лӕмбынӕгдӕр уой. Ахӕм цауты тыххӕй фехъусын кӕнӕн ис ветеринарон службӕмӕ телефоны бастдзинады фæрцы. Уый фадат дӕтты ӕппӕт хӕдзарад дӕр ӕвӕстиатӕй сбӕрӕг кӕнынӕн ӕмӕ, куы бахъӕуа, уӕд æмбæлгæ домæнтæ баххæст кæнынæн, цӕмӕй инфекци ма апарахат уа.
Милдзыхты Амалия, Дзукъаты Маринæ
