Республикæйы сæргълæууæг Сергей Меняйло Мæскуыйы кусæг балцы уæвгæйæ фембæлд бæстæйы промышленность æмæ базарады министр Антон Алихановимæ. Ныхас цыд Цæгат Ирыстоны промышленнон комплексы райрæзтыл.
Фæстаг азты къабаз æнтыстджынæй рæзы. 2024-æм азы фыццаг æмбисмæ регионы промышленнон индекс уыд 118,5 %, уый 14,1% фылдæр у æппæтуæрæсеон бæрæггæнæнæй.
Сергей Меняйло радзырдта, химион промышленносты цæгатирыстойнаг куыстуæтты фæлтæрдзинад æмæ æнтыстыты тыххæй. Республикæйы ис уникалон фæрæзтæ фæсарæйнаг гæрзтæ баивынæн. Цæгат Ирыстоны уадзæн ис химион материалтæ биотехнологийы, радиоэлектроникæйы, медицинæйы æмæ æндæр къабæзтæн. Республикæйы арæзт цæуынц инвестицион фæзтæ, ифтонггонд сты химион кондады архайынæн хъæугæ инфраструктурæйæ. Уыимæ ма бакусæн ис регионалон программæйыл. Уый руаджы нацпроектты архайгæйæ регион æххæст кæндзæн федералон программæты домæнтæ.
