Республикæйы цæттæ кæнынц ног кусджытæ

Уæлæмхасæн мадзæлттæ куысты бынæттæ ссарыны тыххæй. Нæ республикæйы æгуыст адæмы бæрц фæкъаддæр кæныны охыл бирæты ахуыр кæнынц ног дæсныйад райсыныл.  Федералон программæмæ гæсгæ, адæмы куысты бынæттæй ифтонггæнæг комитет нæ республикæйы цæрджыты рæвдз кæндзæн туризмы, арæзтады æмæ инвестицион проекттæ цæттæ кæныны къабæзты кусынæн. Дзырдæн зæгъæм, санатори “Ирыстон”-æн адæмы æнæниздзинад дзæбæх кæнынæй уæлдай ис туризмы райрæзты нысан дæр. Уым се `мгуыстад рапарахат кодтой Ростовы, Волгограды æмæ Санкт-Петербурджы туристон агентадтимæ. Сæ лæггæдтæ фылдæрæй-фылдæр кæнынц нæ республикæйы фысымуаттæ дæр. Сæ разамонджыты ныхæстæм гæсгæ дзы се ргом тынг здахынц куысты хæрзхъæддзинадмæ. Уый тыххæй сæ кусджыты ахуыр кæнынмæ арвитынц иннæ регионтæм. Цы хæрдзтæ баййафынц, уыдон сын фæкъаддæр уыдзысты паддзахадон программæйы фæрцы.