Цæгат Ирыстоны хицауады сæрдар Тускъаты Таймураз абон кусæг балцы бæрæг кæны республикæйы ахсджиаг социалон объекттæ. Мæздæджы районы Садовый поселоччы кадджын уавæры байгом кодтой Фыдыбæстæйы Стыр хæсты архайджытæн цыртдзæвæн. Афтæмæй, поселок чи арæзта, уыдоны ном сæнусон кодтой.
Поселоккыл цæуы 70 азы. Монумент сæвæрдтой меценатты фæрцы. Хъуамæ йæ байгом кодтаиккой раздæр, фæлæ йæ пандемийæйы аххосæй аргъæвтой. Арфæйы ныхæстæ бынæттон цæрджытæн ракодта Цæгат Ирыстоны хицауады сæрдар Тускъаты Таймураз. Фæнысан кодта, куыд ахсджиаг у хæстонты хъæбатырдзинад ма рох кæнын.
Премьер федта хъæуы фелсырон-акушерон пункты уавæр. Аразын æй райдыдтой ацы аз июны. Уыдзæн дзы акушерон, процедурон кабинеттæ. Мæйы кæронмæ куыстытæ хъуамæ фæуой. Уымæй уæлдай ма Тускъаты Таймураз федта, Винограднæйы скъолайы цалцæггæнæн куыстытæ кæронмæ кæй хæццæ кæнынц, уый дæр. Ацы скъола 50 азæй фылдæр цалцæггонд нæ уыд. Ныр дзы ногæй баивтой рудзгуытæ, дуæрттæ, пъолтæ. 3-æм ноябры куыстытæ кæронмæ фæуыдзысты. Премьер йæхæдæг федта кълæстæ. Ныртæккæ Тускъаты Таймураз дарддæр бæрæг кæны Мæздæджы районы социалон объекттæ.
