Цæгат Ирыстоны куыстдæттыны комитет архайы амалхъом адæмæн баххуыс кæнынæн. Уæлдай æргом сæм аздæхтой пандемийæйы рæстæг. Цæрджытæн бакуыстой сæрмагонд проекттыл. Ахæм хуызы сын сæ фæлтæрддзинад фæбæрзонддæр кодтой.
1-октябрæй фæстæмæ пандемийæйы рæстæг йæ куысты бынат чи фесæфта, уыдон уæлæмхасæн социалон фиддонтæ нал исынц. Республикæйы куыстдæттыны комитеты сæрдар Платы Альбинæйы ныхæстæм гæсгæ сæ нал адæргъвæтин кæндзысты.
Уымæй уæлдай ма Платы Альбинæ куыд бамбарын кодта, афтæмæй Уæрæсейы хицауад пандемийæйы рæстæг куыстдæтджытæн аразы æппæт уæлæмхасæн мадзæлттæ дæр. Ныртæккæ профилон комитеты бæстонæй архайынц сæрмагонд программæты райрæзтыл.
Куыстдæттыны комитеты сæрдар ма куыд бафиппайдта, афтæмæй нæ республикæйы цæрджытæн фадат ис сæрмагонд бынӕтты рӕстӕгмӕ куыст ссарын. Пилотон проект фæзынд Сбербанк æмæ Уæрæсейы президенты ӕххӕстминӕварады æххуысæй. Уый фадат ратдзæн цæрджытæн сæ нымæцон цæттæдзинад фæбæрзонддæр кæнынæн æмæ ӕхца бакусын. Проект пилотон фæткмæ гӕсгӕ кусдзæн ноябры дæр.
Ацы аз куыстдæттыны центр равӕрдзӕн 5 гранты конкурсы хуызы. Сæ аргъ фӕйнӕ 300 мин сомы. Грантты сæйраг нысан – хицæн адæймæгтæй йæ куыстуаты райрæзтыл чи архайы, уыдонæн æххуыс. Конкурс ацæудзæн Горæтгæрон районы Черменыхъæуы. Æркасты бацархайынмæ курдиат бадæттæн ис 26-æм октябры онг.
Платы Альбинæйы ныхæстæм гæсгæ, фæстаг æртæ къуырийы фӕллойадон базарады бӕрӕггӕнӕнтӕ сӕ бынатӕй уӕлдай змӕлд нӕ фӕкодтой. Æгуыст адæмы нымæцыл æфтыд мартъийæ нырмæ. Уавæр æппæты æвзæрдæр уыд июль, август æмæ сентябры райдиан. Ныртæккæ уавæр хуыздæры ‘рдæм ивы. Октябры райдианæй æгуыст адæмы нымæц фæкъаддæр. Фæлæ фæллойадон базары бæрæггæнæнтæ ивгъуыд азы фыццаг квартАлмæ раивтой, зæгъынӕн фадат нæй. Хъуыддаг раздæры уавӕрмӕ ӕркӕнынӕн хъæуы рæстæг.
Уазиты Зæлинæ
