Сабитимæ æнгом æмæ æнувыдæй чи кусы, уыдоны ‘хсæн — Рубайты Лианæ дæр. 16 азы дæргъы 44-æм скъолайы ахуырдзаутæн архайы аккаг æмвæзадыл æппæт ахуыртæ дæр цæттæ кæнын.
Рагон архитектурæйы цыртдзæвæнтæ куыд фæзындысты? Аивад куыд сæвзæрд? Рубайты Лианæйы уроктæ сабитæн сты аивадон культурæйы дунемæ фæндаг. Сцымыдис кӕнын ахуырдзауты, семӕ ӕргом ныхас акæнын æмæ алы сывæллоны цæстыты дæр зонынзинды цæхæр фенын. Уый у Льянæйы куысты сæйраг нысан.
Йæ урокты педагог архайы сабиты ахуыр кæнын иннæ предметты зонындзинæдтæй дæр пайда кæныныл. Истори, биологи, физика. Пайда кӕны алуыхуызон методикæтæй. Йæ алы урокмæ дæр сывæллæттæ бæллынц.
Ахуыргæнæджы дæсныйад æмæ дунейы аивадон культурæ Рубайты Лианæ бауарзта йæхи ахуыргæнæджы руаджы. Каст фæци Цæгат Ирыстоны паддзахадон университеты уырыссаг филологийы факультет. Равзæрста истори æмæ аивады теорийы хайад. 5-æм курсы та æрбацыд йæ уарзон скъоламæ кусынмæ. Ныр 16 азы дæргъы йæ дæсныйадыл у æнувыд.
Цы рæстæг кусы ахуыргæнæгæй, уæдмæ Лианæйы фæлтæрддзинад æмæ зонындзинæдтæ зынгæ фæхъæздыгдæр сты. Фæлæ, йӕ хъуыдымӕ гӕсгӕ, хорз урокы сæйраг миниуæг у, сывæллæттæм ирд æнкъарæнтæ кӕй баззайы, уый.
Дзæуджыхъæуы 44-æм скъолайы ахуыргæнджытæй бирæтæн Лианæ канд æмкусæг нæу. Ахуыргæнæг у ацы скъолайы рауагъдон. Ахуырдзауæй фæлтæрдджын педагогы онг фæндагыл ацыд сæ цæстыты раз.
Ацы ахуыры аз Рубайты Лианæ райдыдта куыд скъолайы директоры хæдивæг хъомыладон куысты фарстаты фæдыл. Йӕхӕдӕг куыд зæгъы, афтæмæй йæ бон уыдзæн сывæллæттимæ ноджы æнгомдæрæй æмгуыст кæнын.
Хуасдзауты Алинæ
