Онкологон низтæ дзæбæхгæнæн поликлиникæ Дзæуджыхъæуы ныр кусдзæн Маркусы уынджы. Абон йæ дуæрттæ байтыгъта. Нырма уал поликлиникæйы бынат ис 200 рынчынæн, фæлæ фидæны, куы бахъæуа, уæд фæфылдæр уыдзысты. Онкологон рынчынтæ нæ республикæйы чысыл не сты æмæ ахæм бæстыхай кæй фæзынд, уый сын ахъаззаг у. Дохтыртæ разы сты сæ ног техникæйæ, рынчынтæн та фадат фæцис низ гæнæн æмæ амалæй тагъддæр раиртасынæн. Зыхъуаты Жаннæ темæ дарддæр ахæццæ кæндзæн.
Ногарæзт бæстыхæйттæм кæсгæйæ, алчидæр банхъæлдзæн хуыздæр медицинон центртæй иуы ис, зæгъгæ. Нырыккон домæнтæм гæсгæ ифтонггонд кабинеттæ, боныгон стационары палатæтæ рынчынты удæнцойæн ис алцыдæр. Дохтыртæ æмæ аразджытæ бацархайдтой, рынчынтæ цæмæй мацæмæй тыхсой, ууыл.
Суанты Ларисæ – эндоскопион диагностикæйы хайады сæргълæууæг: «Махæн æнцон кусæн, рынчынтæн та хорз, зæрдæмæдзæугæ уавæртæ… Ахæм хъуыдыйыл хæст сты иууылдæр. Раздæры бæстыхаимæ абаргæйæ, ардæм бацæуын дæр æхсызгон у, æппæт анализтæ æмæ иртæстытæ дæр цыма æнцондæр цæуынц, афтæ мæм кæсы. Поликлиникæйы æмæ республикæйы разымындæй дæр уынæм, нæ уавæртæ фæхуыздæр кæныныл кæй архайынц, уый. Арæх фехъусæн вæййы, зæгъгæ, æхца нæй, нæ фаг кæны – фæлæ ам уый зæгъæн нæй. Ссардтой æхца дæр, уавæртæ дæр скодтой, сæ цæст дæр нæм дарынц, æххуыс кæнынц».
Бирæ азты дохтырты бæллиц уыд ахæм уавæрты кусын. Зортовы уынджы цы бæстыхайы куыстой, уый рагæй уыд базилинаг. Æрмæст йæ уындæй дæр иу зæрдæ ныккæрзыдта. Афтæмæй та рынчынты хъæуынц цины æнкъарæнтæ. Ныр ног центры лæггæдтæ дæр хуыздæр уыдзысты, рынчынтæм дæр фылдæр æргом здахдзысты. Хъыгагæн, бæстыхайы арæзтад ныддæргъвæтин. Куыдфæстæдæр дзы фæнд кодтой горæты рынчындæттæй иуы лабораторон корпус æрбынæттон кæнын. Фæлæ хатдзæджы уынаффæмæ гæсгæ ам сарæзтой онкологон поликлиникæ.
Бесаты Аслæнбег – республикон онкодиспансеры сæйраг дохтыр: «Мах пациенттæ хицæн кæнынц иннæтæй. Низ сыл бафтыд уый иу хъуыддаг у, фæлæ æвзæр низы диагноз кæмæн сæвæрдтой, уыдоны ма бахъæуы психологон æххуыс дæр. Алкæмæн дæр зын у низы тыххæй базонын. Æрхæндæг сыл бахæцы, сæхимæ хъусыныл фæвæййынц. Раздæры бæстыхаймæ æрбацæугæйæ ма иу сæ рыстыл бафтыд. Сæ ныфс иу бынтондæр фесæфт».
Специалисттæ æрбынат кодтой 1 000 квадратон фæзуатыл. Æмæ дзы иунæг кабинет дæр уæгъд лæуд нæ кæны. Алы ран дæр дзы нырыккон кусæнгæрзтæй лæмбынæг æркæсынц рынчынты æмæ пациентты уавæрмæ. Æппæт куыстытæн республикæйы бюджетæй радих кодтой 14 млн сомы. Дзæбæхгæнæндон ГРАНТы хуызы цы 85 млн сомы райста, уыдонæй та балхæдтой медицинон кусæнгæрзтæ æмæ техникæ. Поликлиникæйы ифтонгдзинадæн æмæ куыстыты хæрзхъæддзинадæн аргъ скодта Битарты Вячеслав.
Битарты Вячеслав – РЦИ-Аланийы сæргълæууæг: «Ног азы къæсæрыл се ппæтæн дæр мæ зæрдæ зæгъы сæ низтæ куыд фесæфой. Куыд сдзæбæх уой. Бæркад, амонд æмæ æнтыстдзинæдтæ алкæй къухы æфтæнт. Уæлдайдæр та, не нæниздзинад хъахъхъæнæг дохтыртæ, дзæбæх æмæ фæрнджын ут. Цæмæй уæм рынчынты сæ къæхтыл слæууын кæнынæн кæддæриддæр уой тых æмæ хъару».
Республикæйы сæргълæууæг куыд загъта, афтæмæй ма фидæн аз поликлиникæйæн хъæугæ ног кусæнгæрзтæ балхæнынæн радих кæндзысты 15 млн сомы. Дохтыртæ та ныр дæр цæттæ сты боныгон стационары бындурыл операцитæ кæнын. Уыимæ æнæ буары лыгæй кæй кæнынц, ахæмтæ.
Нырма уал ног поликлиникæйы бонмæ балæггад кæнынц 200 пациентæн. Дохтыртæ та курынц цæмæй се ххуыс кæй хъæуы, уыдон сæхи рады рагагъоммæ ныффысой . Се æнцойдзинадæн уый бакæнæн ис телефоны номыр 53 90 24-мæ æрбадзургæйæ, кæнæ та сæхи дохтырмæ ныффыссой дзæбæхгæнæндоны официалон сайты.
Зыхъуаты Жаннæ, Ангелина Васильева
