Тренировкæты ‘хсæн уæгъд рæстæг арæх нæ вæййы. Дендрарийы атезгъо кӕныны ӕмӕ сыгъдӕг уӕлдӕфӕй сулӕфыны фадатæй сӕрмагонд æфсæддон операцийы ветерантӕ, кӕй зӕгъын ӕй хъӕуы, спайда кодтой. Цыхуырбаты Зауырбег, Джаджиты Сослан ӕмӕ Годжыцаты Сослан ӕрӕджы армрестлингӕй ерыстӕй ӕрыздӕхтысты “Фыдыбӕстӕйы Кубок”-æй.
Спортсментӕ æвзарынц сæ архайды лыстæгдзинæдтæ ӕмӕ хатдзӕгтӕ кӕнынц. Сæрмагонд æфсæддон операцийы хæстонты ‘хсæн æппæтуæрæсеон ерыстӕ “Фыдыбӕстӕйы Кубок”-ы архайджыты ‘хсӕн ныридæгæн сарæзтой дыккаг хатт Гатчинæйы.
Цыхуырбаты Зауырбег сыгъзӕрин рамбылдта 85 килограммы уӕзы категорийы. Лæппуйæн фыццаг уӕлахиз нӕу.
Ныр афӕдз ӕмӕ ӕрдӕг Зауырбег тренировкӕ кӕны Уӕрӕсейы сгуыхт тренер Чочиты Ибрагимы разамындӕй. Хорз арæхстдзинад равдыста Джаджиты Сослан дӕр, саккаг ын кодтой Жуковы майдан. Спортсмен архайдта 70 килограммы уӕзы категорийы. Армрестлингмӕ сæрмагонд æфсæддон операцийы архайӕг ӕрбацыд цалдæр мӕйы размӕ. Йӕхӕдӕг куыд зæгъы, афтӕмӕй йæ сразæнгард кодта Зауырбег. Тренеры фæлтæрддзинад ын баххуыс кодтой хорз бæрæггæнæн равдисынæн.
Бронзӕйы аккаг сси Лӕгдзинады ордены кавалер Годжыцаты Сослан. Спортсмен йӕхӕдӕг куыд зӕгъы, афтӕмӕй чысыл нӕ фаг кодта тых ӕмӕ техникӕ. Ныртӕккӕ йӕхи цӕттӕ кӕны ӕндӕр ерыстӕм — пауэрлифтингӕй. Уыдон хæстæгдæр рæстæг ацӕудзысты Мӕскуыйы.
Цыхуырбаты Зауыр дӕр йӕхи цӕттӕ кӕны ерыстӕм — фӕззӕджы архайдзӕн армрестлингӕй дунейы чемпионаты Индийы. Рӕстӕг ын фаг кæны. Тренеримӕ иумӕ ныридӕгӕн сарӕзтой цӕттӕгӕнӕн программӕ. Лӕгдзинады ордены кавалер йӕ тыхтыл дызæрдыг нæ кæны.
Лидия Цахилова, Артур Сулоев
