Сыгъдæг хъуыдытæ, урс уæлæдарæс æмæ бæгъæмвадæй. Зæдбадæн бынаты æрлæууыны размæ хи бацæттæ кæнын хъæуы. Бӕрӕгбонмæ нӕлгоймӕгтӕ ӕртӕ боны фæдарынц ком – сæ фынгтыл нæ вæййы æйчытæ, дзидза æмæ æхсырæй конд продукттæ. Афтæмæй, аивæй ссæуынц Дзуары бынмæ. Цъæйы коммæ фæндаг цыбыр нæу, фæлæ уый никæй уромы. Ӕртӕ кæрдзыны, æртæ фæрсджы ӕмӕ хӕдзарон бӕгӕныимӕ дунейы алы рӕттӕй сӕдӕгай ирӕттӕ ӕрцыдысты ардӕм, цӕмӕй иумæйагæй бакувой.
Хуыцауы минæварæй курынц ӕнӕниздзинад, фарн. Бӕрӕгбонӕн йӕ уидӕгтӕ цӕуынц рагзамантӕм. Таурæгъмæ гæсгæ Реком фæзынд, Хуыцау Нарты Батразы амæлæты фæстæ, цы æртæ цæссыджы æркалдта, уым.
Алы мыггагӕн дӕр ис йӕхи фынг. Фӕлӕ хойраг равӕрыны ӕмӕ скувыны размӕ кувӕндоны алыварс ӕртӕ хатты ӕрзилын хъӕуы – дунейы сконды ӕртӕ ӕмвӕзады символ – арв, хур ӕмӕ зӕхх. Ахӕм ӕгъдӕуттӕ цӕуынц фӕлтӕрӕй-фӕлтӕрмӕ. Ханайты Георгий ма хъуыды кӕны, ардӕм сывӕллонӕй куыд цыд, уый. Абон та Рекомы ис йæ цотимæ.
Ханайты кæстæртæ архайынц бӕрӕгбон хӕларӕй ӕмӕ æгъдаумæ гӕсгӕ бӕрӕг кӕныныл. Нæ рох кæнынц абон сæрмагонд æфсæддон операцийы бынаты раззагдæр рæнхъыты чи тох кæны, уыдоны дæр. Сæ номыл хъуысыдысты хицæн куывдытæ.
Георгийимæ Рекоммӕ ссыд 10 адӕймагӕй фылдӕр. Мыггаджы ахсджиагыл нымайынц кæстæртæн суанг сабийæ фӕстӕмӕ традицитæ дæттын. Чысыл Рустам дæр йæ хъуыдытæ загъта.
Сылгоймæгтæн ардæм цæуыны бар нæй. Уыдонæн ис сæхи дзуæрттæ – Мадымайрæмы æмæ чызджыты. Бынаты сыл бинонты фæдзæхстой, кæстæртæн куырдтой æнæниздзинад æмæ рухс фидæн.
Рекомы алкæддæр куывтой сæйрагдæр хъуыддæгтыл. Бæлццæттæ-иу сæхи фæдзæхстой дард фæндаджы размæ. Иу ныхасæй ацы бынат раст цыма арв æмæ зæххæ кæрæдзиуыл бæтты, афтæ у. Уымæ гæсгæ дзы банкъарæн ис алæмæты тых.
