Сергей Меняйло амыдта горæты æнцонвадат уавæртæ аразыны фæдыл къамисы ӕмбырд

Сергей Меняйло амыдта горæты æнцонвадат уавæртæ аразыны фæдыл къамисы ӕмбырд. Ацы аз 41 ӕхсӕнадон территори саив кæнынæн æвæрд ӕрцыд 430 млн сомӕй фылдӕр. Куыстытӕн сӕ фылдæр хай пъланмæ гæсгæ ацæудзысты Дзæуджыхъæуы – сног кӕндзысты 18 ӕхсӕнадон зонӕйы, иннӕтӕ – республикӕйы районты. Ӕмбырды архайджытӕ ӕркастысты 5 курдиатмӕ, уыдон хъавынц хуыздӕр проектты æппæтуæрæсеон конкурс «Малые города и опорные населенные пункты»-йы къæпхæны фæуæлахиз уæвын. Дзӕуджыхъӕу архайдзӕн фыццаг хатт ӕмӕ рӕгъмӕ рахӕсдзӕн горӕты Промышленнон микрорайоны «Малая водная»-йы хӕрзвадат кӕныны проект. Уый размӕ экологон ӕгъдауӕй раст хъуыддагыл нымад нæ уыд, раздӕры завод “Электроцинк” дзы кӕй ис, уый тыххӕй. Ӕрыдоны хъавынц горӕты сӕйраг парк саив кӕнын. Дигорайы фæнд кæнынц Тогойты-фырты уынг дарддӕр аив кæнын. Елхоты хъӕуы раздӕры стадионы бынаты фӕнд кӕнынц парк саразын, уыимӕ стадион йӕхӕдӕг бахъахъхъӕндзысты, йӕ алыварс та фӕзындзӕн ног зонӕтӕ уæгъд рӕстӕг æрвитынæн ӕмӕ культурон мадзӕлттӕ аразынӕн. Мӕздӕджы район бацæттæ кодта сӕйраг фӕз сног кӕныны проект Мӕздӕджы – горӕты ӕхсӕнадон-ахсджиаг мадзӕлттӕ кӕм цӕуынц, уыцы бынат.